Александр Данилов тактическай ытыыга чөмпүйэнээккэ кыһыл көмүһү ылла

Саха сирин ыраах дистанцияҕа ытыыга Федерациятын бэрэссэдээтэлэ Александр Данилов РФ Сэбилэниилээх Күүстэрин аармыйа тактическай-ытыы многоборьетын чөмпүйэнээтигэр снайпер хайысхатыгар кыһыл көмүс мэтээли ылан, чөмпүйүөн буолла.

Чөмпүйэнээт сэтинньи 18-22 күннэригэр Москва уобалаһын «Патриот» пааркатыгар буолан ааста. «Чөмпүйэнээккэ барыта 500-кэ киһи араас хайысханан, ону тэҥэ Арассыыйа байыаннай-патриотическай түмсүүлэрэ кытыннылар. Ытааччылар биэс күн устата тымныы, уустук күн-дьыл усулуобуйатыгар чугас уонна ыраах дистанцияларга ытар маастарыстыбаларын көрдөрдүлэр. Мин байыаннай сулууспалаахтар бэлэмнэрин таһымын олус сөбүлээтим. Кинилэр таһымнара бүтэһик сылга олус үрдээбит. Арассыыйаҕа саамай улахан ытыы күрэҕин тэрийии үрдүк таһымнаахтык ааста. Эбиитин, биһиги «Сулус» полигоммутугар мунньуммут уопуппут туһалаата. Биһиги хамаандабытыгар билигин маннык турнирдар бары мэтээллэрэ баар буолла. Дойдубут оборуонаҕа кыаҕын бөҕөргөтөр дьаһалларга көхтөөхтүк кыттаргыт иһин барыгытыгар махтанабын», – диэн санаатын үллэһиннэ Александр Данилов.

Дьаһал сүрүн тэрийээччитинэн РФ Сэбилэниилээх Күүстэрин бойобуой бэлэми сүрүннүүр управлениета буолла. Чөмпүйэнээт сыала — байыаннай дьайыы кэмигэр мунньуллубут саҥа уопуту учуоттаан, байыаннай сулууспалаахтар уокка уонна тактикаҕа бэлэмнэрин таһымын үрдэтии.

Санатан эттэххэ, Саха сиригэр 2023 сыллаахха РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ – вице-премьер Юрий Трутнев сорудаҕынан ытыыга «Сулус» үөрэтэр-эрчийэр полигон тэриллибитэ. Бу ытыы эбийиэгэ дойдуга 3800 миэтэрэ ыраахха ытыы кыаллар аҕыйах ахсааннаах сирдэриттэн биирдэстэрэ буолар. Полигон күнүс эрэ буолбакка, түүн эмиэ ытыыга испиэслиистэри бэлэмнииргэ кыах биэрэр наадалаах тиэхиньикэнэн хааччыллыбыт.

Быйыл, Улуу Кыайыы 80 сылыгар, «Сулус» полигонугар Аҕа дойду Улуу сэриитин чулуу снайпера, Сэбиэскэй Сойуус Дьоруойа Федор Матвеевич Охлопков аатыгар анаммыт ыраах дистанцияҕа ытыыга үһүс Бүтүн Арассыыйатааҕы турнир ыытылынна. Турнирга 120-тэн тахса ытааччы, ол иһигэр байыаннай дьайыы кыттыылаахтара кытыннылар.