Александр Колесов: «Снайпердар хамсааһыннара иккис тыынын ылла»

2023 сыллаахха от ыйыгар Дьокуускайга аһыллыбыт  «Сулус» киин үлэтэ салҕанар.

Бу киини байыаннай дьайыы кыттыылааҕа, Арассыыйа Дьоруойа Александр Колесов салайар. «Сулус» үөрэтэр кииҥҥэ үөрэнээччилэри, байыаннай сулууспалаахтар бөлөхтөрүн кытта үлэ тиһиктээхтик ыытылларын кини бэлиэтиир.

«Биһиги снайпердары полигоҥҥа бэлэмниибит. Билигин чопчу ытар маастардары бэлэмниир көдьүүстээх методика оҥоһулунна. Снайпердар хамсааһыннара Арассыыйаҕа иккис тыынын ылла«, — диэн этэр кини.

Полигоҥҥа ырааҕы ытарга Сэбиэскэй Сойуус Дьоруойа Федор Охлопков кэриэһигэр Бүтүн Арассыыйатааҕы икки турнир ыытыллан турар.

Санатар буоллахха, 2023 сыллаахха ыам ыйыгар хорсун-хоодуот уонна дьоруойдуу быһыытын иһин, «Боотур» добровольческай этэрээт хамандыыра Александр Колесов РФ Бэрэсидьиэнэ Владимир Путинтан Арассыыйа Дьоруойун үрдүк аатын сулуһун үөрүүлээх быһыыга-майгыга туппута.

Бүгүн Арассыыйа Дьоруойа Александр Колесов патриотическай иитиинэн дьарыктанар, уопсастыбаннай үлэнэн көхтөөхтүк дьарыктанар. Кини улуустарынан элбэхтик сылдьар уонна ыччакка «Эр санаа уруогун» тиһиктээхтик ыытар.

СӨ Ил Дарханын уонна Бырабыыталыстыбатын пресс-сулууспата