Александр Кошуков: «Байыаннай сулууспалаахтар дьиэ кэргэттэригэр көмөлөһөргө бэлэммин»

Александр Кошуков: «Юридическай, социальнай уонна тэрээһин да өттүнэн көрсөр үгүс кыһалҕаларын туоратыыга, байыаннай сулууспалаахтар дьиэ кэргэттэригэр Ил Түмэн дьокутаатын быһыытынан, тус бэйэм өттүбүттэн туох кыалларынан көмөнү оҥорорго бэлэммин».

— Аан дойду устуоруйатыгар өссө биир уустук быһыы-майгы үөскээтэ. Манна туох да киһи сонургуура суох. Арҕааҥылар Арассыыйаны хаһан да сөбүлээбэт этилэр. Былыргы Русь судаарыстыба быһыытынан үөскээн, сайдан саҕалаабыт кэмиттэн ыла икки цивилизация утарыта турсуута баара — арҕааҥы католическай уонна Арассыыйатааҕы православнай.
Санаан көрүөҕүҥ, XIII үйэҕэ Новгород кинээһэ Александр Невскэй немец уонна швед сэриилэрэ дойду хотугулуу-арҕааҥы сирдэрин ылаары, Балтийскай муораҕа тахсыыны бопсоору санаммыттарын, норуоту түмэн кыайбытын, XVII үйэҕэ Москваны ылан бэйэлэрин поляк хоруолларын олордоору сананан киирбит польскай интервеннэр хайдах кыйдаммыттарын… Европа Русь утары сэриилэрэ ити эрэ буолбатах. Санаан көрүҥ, Петр Первэй Хотугу сэриинэн ааттаммыт шведтэри кытта сэриитэ 20-тэн тахса сыл салҕанан барбыта. Ити сэриилэртэн Арассыыйа куруутун кыайыылаах тахсыбытын билэбит.

Билигин арҕаа дойдулар Украинанан сирэйдэнэн Арассыыйа иннин ыла сатыыллара ырылыччы көстөн таҕыста. Ол иһин Арассыыйа байыаннай, политическай салалтата маннык быһыыга-майгыга сөптөөх харда дьаһалы ылыныытын саамай сөптөөх дии саныыбын.
АХШ уонна кини хос моонньохторун соруктара – биһиги дойдубут кыраныыссатын аттынааҕы сирдэри «антиРоссия» сирдэрэ оҥортоон, бэйэтин хонтуруолугар толору киллэрии. Ол да иһин НАТО дойдуларыттан итиннэ сэриилэрин киллэрэллэр, аныгы сэрии сэбинэн күүскэ хааччыйаллар. Оттон итинник быһыыланыылара биһиги дойдубутугар норуот уонна судаарыстыба баар буолуутугар, барыбыт историческай кэскилигэр тыын суолталаах. Онон биһиги өбүгэлэрбит, эһэлэрбит курдук, Аҕа дойдубутун көмүскүүр ытык иэстээхпит.
2022 сыл олунньу 24 күнүгэр РФ Бэрэсидьиэнэ Владимир Путин анал байыаннай эпэрээссийэни саҕалыыр туһунан биллэрбитэ. Дойдубут тула үөскээбит кутталлаах геополитическай быһыы-майгы манныкка тиэрдибит кэмигэр бу туһааннаах бириэмэтигэр эрэ буолбакка, саамай сөптөөх быһаарыы буоларын бука бары өйдүөх тустаахпыт. Биһиги сыалбыт – дьону-сэргэни харыстааһын уонна дойдуга куттал суох буолуутун хааччыйар усулуобуйалары тэрийии. Бу сыалбытын бука бары туох да халбаҥа суох толоруох тустаахпыт.

2022 сыл балаҕан ыйын 21 күнүгэр Арассыыйа Бэрэсидьиэнэ Владимир Путин биллэрбит быстах хомуурун дойду үгүс олохтоохторо өйөөтүлэр. Хас биирдии чунуобунньук саһан олорбокко, анал байыаннай эпэрээссийэни өйүүрүн туһунан тус санаатын аһаҕастык этиэх тустаах. Эбэтэр, дуоһунаһыттан баҕа өттүнэн барыан наада! Саҥата суох олоруу араас саарбахтааһыны, ыйытыктары үөскэтэрин ааһан, өстөөх интэриэһигэр үлэлиэн сөп. Хас биирдии патриот, Арассыыйа олохтооҕо Сэбилэниилээх күүстэрбитигэр, Аҕа дойдубут, норуоппут көҥүлүн уонна тутулуга суох буолуутун көмүскүүр туһугар дойду Бэрэсидьиэнэ ылыммыт быһаарыытыгар күүстээх санаабытынан идеологическай өйөбүлү оҥорор эбээһинэстээхпит. Ким да икки кириэһилэҕэ олоруо суохтаах!
Ил Дархан Айсен Николаев анал байыаннай эпэрээссийэҕэ сылдьар байыаннай сулууспалаахтары уонна кинилэр дьиэ кэргэттэрин өйүүр дьаһалларын олоххо киллэриини, ханна да барытыгар былаас болҕомто киинигэр тутуохтаах. Өрөспүүбүлүкэ дьокутааттара мобилизованнай дьоммутугар чэпчэтиилэри көрүү ороскуотун бүддьүөккэ кичэйэн оҥоро сылдьаллар. Атын ыстатыйалартан сыҕарыталаан булан, 2022 сыл бүтүөр диэри бу сыалга 30 мөл солкуобай көрүлүннэ. 2023 сыл бүддьүөтүн барылын иккис ааҕыытыгар көннөрүүлэри киллэриэхпит. Ил Дархан быстах ыҥырыынан барбыт дьоммут уонна кинилэр дьиэ кэргэттэрин социальнай өттүнэн өйүүр араас өрүттээх дьаһалларынан улуустарга, куораттарга, нэһилиэктэргэ үлэ күүскэ бара турар.
Айсен Николаев дьаһалынан Москваҕа өрөспүүбүлүкэ Бастайааннай бэрэстэбиитэлистибэтин баазатыгар анал байыаннай эпэрээссийэҕэ кытта сылдьар сулууспалаахтарга уонна кинилэр дьиэ кэргэттэригэр туох кыаллар көмөнү оҥорууга былаас уорганнарын үлэлэрин сүрүннүүр Киин тэриллэн үлэлиир. Улуустар баһылыктара бу дьонноругар эбии чэпчэтиилэри бэйэлэрэ олохтуур кыахтаахтар. Саха сирин Аҕа баһылыга ылыммыт ити быһаарыыларын толору өйүүбүн. Бу улахан суолталаах соруктары олоххо киллэриигэ күүспүтүн, кыахпытын түмэн, бииргэ үлэлииргэ былаас бары салааларын ыҥырабын!
Юридическай, социальнай уонна тэрээһин да өттүнэн көрсөр үгүс кыһалҕаларын туоратыыга байыаннай сулууспалаахтар дьиэ кэргэттэригэр туох кыалларынан көмөнү Ил Түмэн дьокутаатын быһыытынан тус бэйэм өттүбүттэн оҥорорго бэлэммин.