Александр Крылов кэриэһигэр Арассыыйатааҕы турнирга аатырбыт тустууктар кытталлар

Бу өрөбүллэргэ, алтынньы 14-15 күннэригэр, «Триумф» спортивнай уораҕайга РФ спордун маастара, СӨ  IV ыҥырыылаах Судаарыстыбаннай Мунньаҕын (Ил Түмэн) дьокутаата Александр Крылов кэриэһигэр көҥүл тустууга Бүтүн Арассыыйатааҕы иккис турнир ыытыллар.

Бу күрэхтэһии эрэгийэннэр икки ардыларынааҕы, Арассыыйатааҕы уонна норуоттар икки ардыларынааҕы физкультурнай тэрээһиннэр 2023 сыллааҕы халандаарынай былааннарыгар киллэриллибиттэрэ улахан суолталаах уонна дойду таһымнаах.

Александр Крылов кэриэһигэр көҥүл тустууга Бүтүн Арассыыйатааҕы турнир иккис сылын ыытыллар. Бүгүн «Триумф» спортивнай уораҕайга тэрээһини үөрүүлээхтик аһыы сиэрэ-туома буолла.

Күрэхтэһиигэ уон ыйааһыҥҥа бастыҥ бөҕөстөрү быһаарыахтара. Турнирга Саха сириттэн, Бурятияттан, Иркутскай уобаластан, Хабаровскай кыраайтан, Красноярскай кыраайтан, Приморьеттан уонна Тываттан кытталлар.

Турнир бастакы түһүмэҕэр  бэйэтин ыйааһыныгар 23 саастаах  спорт маастара, Уһук Илин уокуругун боруонса призера, Александр Крылов биир дойдулааҕа, Өймөкөөн улууһун кэскиллээх ыччата Любомир Ашеин кыайыыны ситистэ.

Тэрээһин туһунан СӨ Көҥүл тустууга сүүмэрдэммит хамаандатын кылаабынай тириэньэрэ Александр  Оконешников санаатын маннык үллэһиннэ:

Александр Крылов биир дойдулаахтара, Өймөкөөн улууһун бас-көс дьоно бу тэрээһини ыытыыга  көхтөөх кыттыыны ыллылар.

Турниры анаан кэтээн көрөр дьон кытта бааллар эбит. Кинилэртэн биирдэстэрэ агроном идэлээх Мэҥэ Хаҥаластан төрүттээх куорат олохтооҕо  Максим Афанасьев. 

Улахан дьону кытта тэҥҥэ тустуу турнирын бэркэ кэрэхсээн көрө сылдьар оскуола оҕолорун көрсө биэрдим. 25 №-дээх орто оскуола үөрэнээччилэрэ Эрчим Тюляхов уонна Эрчимэн Сивцев бу кыра бэйэлэрэ Арассыыйа куораттарыгар тустан кэлбит уопуттаах дьон быһыытынан ааттаах-суоллаах тустууктары анаан үөрэтэ кэлбиттэр. Бу туһунан кинилэр санааларын маннык үллэстэллэр:

Уолаттар лоп-бааччы сахалыы кэпсэтэллэрин истэн, туох кистэлэ кэлиэй, соһуйдум. Онон салгыы маннык кэпсэтии таҕыста:

Ити курдук,   Александр Крылов кэриэһигэр буола турар көҥүл тустууга Бүтүн Арассыыйатааҕы турниры бэрт интэриэһинэй дьон кэлэн көрө сылдьаллар.

Күрэхтэһии тыҥааһыннаах күнэ — сарсын. Бириистэрэ — ботуччу. Кыайыылаах тустуук  – 70 тыһ. солк., иккис миэстэ – 50 тыһ. солк., үһүс миэстэ – 30 тыһ. солк. наҕараадаланаллар. Кыайбыт тустуук тириэньэригэр – 20 тыһ. солк. Кыайыылаахтар бэйэлэрин истэригэр сэрэбиэйдэһиэхтэрэ. Онно дьоллоох киһи өссө 1 мөлүйүөн солкуобайга тиксиэҕэ.