Александр Кугаевскай: «ПМЭФ-2023 өрөспүүбүлүкэбит сайдарыгар сүдү суолталаах тэрээһин»

“Петербурдааҕы норуоттар икки ардыларынааҕы экэнэмиичэскэй пуорум кэмигэр Саха сиригэр туһуламмыт сүдү суолталаах тиэмэлэри ырытыы буолла”, — диир ХИФУ ректорын анаалыска уонна эспиэрдиир үлэҕэ солбуйааччы Александр Кугаевскай.

“Бу пуорум улахан суолталаах тэрээһин буолар, тыҥаан турар тыын боппуруостары быһаарыыга улахан көдьүүстээх үлэни ыытарга көмөлөһөр. Саха сирин дэлэгээссийэтэ бары былаһааккаларга көхтөөхтүк кытыннылар. Бу пуоруму сыл аайы кэтээн көрөр үгэстээхпин, чахчы, өрөспүүбүлүкэ сытыы кыһалҕалара бу тэрээһиҥҥэ быһаарыллаллар”, — диэн Кугаевскай бэлиэтиир.

Александр Кугаевскай пуорумҥа ХИФУ кыттыытын туһунан маннык этэр: «Быйыл университет Арктиканы чинчийиигэ Арассыыйа уонна Азия дойдуларын консорциумун аатыттан кытынна. Консорциумҥа Уһук Илин уонна Арктика эрэгийиэнннэрин сайдыытын министиэристибэтэ, тас дьыалалар министиэристибэтэ, Арктика зонатын уопсастыбыннай сэбиэтэ киирэллэр. Пуорумҥа вездеход тырааныспары Саха сиригэр туттуу кыһалҕатын ырыттыбыт, Курчатов аатынан институту кытта дьоҕус атомнай ыстаансыйалар ситимнэрин тэнитии туһунан бэрт сэргэх кэпсэтии буолла”, — диэн эспиэр кэпсээтэ.