Александр Кугаевскай: «Үрдүк көрдөрүү – Саха сирин олохтоохторо бэлитиичэскэй уонна демократическай ситиилэрин-хотууларын көрдөрөр»

Саха сиригэр Арассыыйа Бэрэсидьиэнин быыбара түмүктэнэн, быыбардыыр учаастактарга куолаһы ааҕыы бара турар. 

М.К. Аммосов аатынан ХИФУ ректорын солбуйааччы  Александр Кугаевскай этэринэн,  өрөспүүбүлүкэ олохтоохторо быыбарга кыттыыларын үрдүк көрдөрүүтэ – кинилэр бэлитиичэскэй уонна демократическай ситиилэрин-хотууларын көрдөрөр.

«Арассыыйа Бэрэсидьиэнин 2024 сыллааҕы быыбара олус уратытык ааста. Куоластааһын бастакы күнүгэр хайыы-үйэ учаастактарга быыбардааччылар настарыанньалара өрө көтөҕүллүүлээх этэ, оннук бу үс күнү быһа барда.  Быыбарга кыттыы саамай үрдүк көрдөрүүлэрэ байыаннай дьайыы бара турар уонна ол аттыгар сытар субъектарга бэлиэтэнэр. Быыбар уопсай түмүгэ – Арассыыйа Бэрэсидьиэнигэр норуот бүттүүн итэҕэлин көрдөрүү, кини бэлиитикэтин уонна бырагырааматын өйөөһүнүн көрдөрүү буолар», — диэн Александр Кугаевскай этэр.

Ону таһынан ХИФУ ректорын солбуйааччы быыбар сокуонун кэһии тахсыбатаҕын бэлиэтиир.

«Бу быыбар хампаанньата үчүгэй тэриллиитин, уопсастыбаннай кэтээн көрөөччүлэр үлэлэрэ көдьүүстээҕин көрдөрөр. Киһи үөрэрэ баар, Уһук  Илин уокурук биир да эрэгийиэнигэр кэһии тахсыбата.  Ити барыта  Арассыыйа Бэрэсидьиэнэ уонна кини Уһук Илиҥҥэ  бэрэстэбиитэлэ– РФ Бырабыыталыстыбатын бэрэссэдээтэлин солбуйааччы Юрий Трутнев  өттүлэриттэн Уһук Илин уокурукка ураты болҕомто ууралларын көрдөрөр», — диэн эспиэр бэлиэтиир.