Александр Островскай «Ойуур» кэмиэдьийэтэ аан бастаан хаһан көрдөрүллүбүтэй? (видео)

Сотору кэминэн, ахсынньы 10-11 күннэригэр,  Б.Ойуунускай аатынан Саха тыйаатырыгар А.Н.Островскай “Лес”  (“Ойуур”) кэмиэдьийэтэ режиссер Сергей  Потапов туруоруутугар сүрэхтэниэҕэ.

Бу испэктээк тыйаатыр репертуарыгар хаһан эмэ киллэриллэ, көрдөрүллэ сылдьыбыта дуо?

1949 сыллаахха оруобуна ахсынньы 10 күнүгэр аан бастаан көрдөрүллүбүт эбит. Оччолорго Сэбиэскэй сойуус норуодунай артыыһа буола илик Василий Васильевич Местников туруорбут.

Онон, оруобуна 73 сыл анараа өттүгэр ахсынньы 10 күнүгэр сүрэхтэммит испэктээк 2022 сыл ахсынньы 10 күнүгэр аныгы режиссер хараҕынан көрөөччүгэ тиийиэҕин долгуйа күүтэбит.

Онтон оччотооҕу кэм “Ойуур” испэктээгэ ханнык толкуйунан туруоруллубутун, ханнык артыыстар оонньообуттарын уонна А.Н.Островскай атын да пьесаларын туһунан Саха тыйаатырын мусуойун сэбиэдиссэйэ Ефим Николаевич Степанов ахтан-санаан ааста.

(Сиһилии “Саха сирэ” хаһыат 8 күнүнээҕи нүөмэригэр ааҕыҥ)