Александр Подголов: «Быһа лииньийэҕэ» бары боппуруостар таарылыннылар»

Ил Дархан Айсен Николаевы кытта «Быһа лииньийэ» кэмигэр нэһилиэнньэ бары араҥатыгар сыһыаннаах боппуруостар таарылыннылар.

Бу туһунан Ил Түмэн байыаннай сулууспалаахтар, бойобуой дьайыылар бэтэрээннэрин дьыалаларыгар, патриотическай иитиигэ уонна уопсастыбаннай тэрилтэлэргэ сис кэмитиэтин бэрэссэдээтэлэ, Ил Түмэн Бэрэссэдээтэлин солбуйааччы  Александр Подголов санаатын үллэһиннэ.

««Быһа лииньийэ» кэмигэр барыларын кэриэтэ таарыйар боппуруостар көтөҕүлүннүлэр. Оҕолортон 80-ча саастарыгар диэри аҕам саастаахтарга тиийэ. Баһылык уочараттаах быһа лииньийэҕэ балаһыанньаны тутан олорорун уонна популизмы сөбүлээбэтин көрдөрдө», — диэтэ Александр Подголов. Паламент бэрэссэдээтэлин бэлиэтииринэн, маны сэргэ кини салайар үлэтигэр сыһыаннаах ыйытыктар эмиэ киирдилэр. «Ил Дархан олохтоох салайыныы боппуруостарыгар эппиэтинэһи салайааччылар бэйэлэрэ сүгэллэригэр уонна куттамакка баар соруктары быһаарыахтаахтар диэтэ. Итини кытта сөбүлэһэбин», — диэтэ Александр Подголов.