Александра Копылова уонна Лилиана Рожина Арассыыйа чөмпүйэнээтин кыайыылаахтарынан буоллулар

Саха сирин дьахталларын тустууга сүүмэрдэммит хамаандатын лиидэрдэрэ Александра Копылова уонна Лилиана Рожина Арассыыйа чөмпүйэнээтигэр 24-гэр диэри саастаах юниордар ортолоругар кыһыл көмүс мэтээли ылары ситистилэр. Бу туһунан СӨ Успуордун министиэристибэтэ иһитиннэрэр.

Былырыын Александра Копылова бу стартка боруонса призер буолбут буоллаҕына, бу сырыыга кыһыл көмүһү ылла. Биһиги спортсменкабыт 50 киилэҕэ өрөспүүбүлүкэ чиэһин көмүскээтэ. Түмүк киирсиигэ Копылова Хакасия бэрэстэбиитэлин Алина Сагалакованы 5:1 ахсаанынан кыайан бастаата.

Лилиана Рожина (72 кг), былырыыҥҥы курдук, үс кыайыыны ситиһэн, финалга тустар быраабы ылла. Кини бу сырыыга Арассыыйа чөмпүйэнээтин пьедестаалын саамай үрдүк үктэлигэр тахсары ситистэ. Кыһыл көмүс иһин киирсиигэ Санкт-Петербургтан Олеся Безуглованы 8:1 ахсаанынан кыайда.

Санатан эттэххэ, бу күрэхтэһии алтынньы ый бүтүүтэ буолар 24-гэр диэри саастаах күрэсчиттэр ортолоругар аан дойду чөмпүйэнээтигэр кыттарга сүүмэрдиир түһүмэх буолар.