Александра Лазукина дойду талааннаах ыччатыгар Саха сирин билиһиннэрэр

Дьокуускайга «Үлэ кыбаартала» креативнай кластерга «Создано на Дальнем Востоке» диэн норуоттар икки ардыларынааҕы пуорумҥа Арассыыйа эрэгийиэннэриттэн бэрт элбэх уопсастыбаннай диэйэтэл, эспиэр кэлбит.

Кинилэртэн үгүстэрэ спикер быһыытынан араас сиэссийэлэри ыыталлар, дьон санаатын атастаһар былаһааккаларын тэрийэллэр. Кинилэртэн биирдэстэринэн «Живые города» куораттар сайдыыларын тэрийээччилэр сойуустарын салайааччыта, дойду таһымыгар ыытыллар БРИКС ускуустуба бэстибээлин эппиэттээх сэкирэтээрэ Александра Лазукина буолар. Москваттан сылдьар ыалдьыт быйыл Саха сиригэр төрдүс кэлиитэ. Александра Саха сирин олус сөбүлүүрүн, манна ураты толкуйдаах айар дьон олорорун туһунан бэлиэтээн эттэ. Кини бэс ыйыгар Саха сирин 10 куоратыгар айар талааннаах ыччаты аҕалаары сылдьарын туһунан сырдатта.

Александра Лазукина дойду талааннаах ыччатын түмэн, Саха сирин билиһиннэрэр. Ол курдук, быйыл култуура грааныгар кыайыыны ситиһэн, ыччаты Хабаровскайга буолар ускуустуба бэстибээлигэр кытыннарыаҕа. Ол иннинэ ыччат Саха сирин куораттарыгар сылдьан кэнсиэрдиэхтэрэ.