Александра Золотарева: «Хас биирдии киһи уһуннук олоруохтаах…»

Александра Григорьевна Золотарева «СПИД-Киин» кылаабынай бырааһынан 2023 сыл ыам ыйыгар анаммыта. Кылаабынай бырааһынан ананыар диэри Өрөспүүбүлүкэтээҕи 2 №-дээх балыыһа кылаабынай бырааһын солбуйааччытынан үлэлээбитэ. Кини — бырактыычаскай үлэҕэ улахан уопуттаах доруобуйа харыстабылын тэрийээччи.

Александра Золотарева Ил Дархан Айсен Николаев Анал этиитин  истэн баран санаатын үллэһиннэ:

«Хас биирдии киһи уһуннук уонна чэгиэн туруктаах олоруохтаах. Онуоха дойду бэрэсидьиэнэ Владимир Путин уонна өрөспүүбүлүкэ Ил Дархана Айсен Николаев улахан болҕомтолорун уураллар.

Айсен Николаев СӨ Судаарыстыбаннай мунньаҕар (Ил Түмэҥҥэ) Анал этиитигэр Саха сирин олохтоохторун доруобуйаларын бөҕөргөтүү сүрүн стратегиятын – ыарыыны эрдэттэн сэрэтии үлэтин  уонна персонализированнай мэдиссиинэҕэ көһүүнү бэлиэтээтэ. Ыарыыны эрдэ булуу, саҥа технологиялар уонна ускуустубаннай интеллект көмөлөрүнэн киһи доруобуйатын туругар мониторинг көмөлөрүнэн өлүү ахсаана биллэ аҕыйыаҕа».