Алексей Агапов мас-рестлиҥҥэ Арассыыйа бастакы үтүөлээх тириэньэринэн буолла

Саха сирин элбэх спортсменнарын үөрэппит Алексей Агаповка дойду успуордун миниистирэ Михаил Дегтярев бирикээһинэн мас-рестлиҥҥэ Арассыыйа үтүөлээх тириэньэрин үрдүк аатын иҥэрдилэр.

Ол туһунан «Триумф» пресс-сулууспата иһитиннэрэр. Мас-рестлинг историятыгар Саха сиригэр Арассыыйа үтүөлээх тириэньэрэ суох этэ. Бастакынан үрдүк ааты Амма улууһуттан Алексей Агапов ылла.

Бирикээскэ муус устар 30 күнүгэр миниистир илии баттаан, бүгүн официальнай сайтка таҕыста. Алексей Агапов хаһыс да сылын Саха сирин мас- рестлиҥҥэ сүүмэрдэммит хамаандатын сүрүн тириэньэринэн, ону тэҥэ элбэх ааттаах-суоллаах спортсменнар уһуйааччытынан буолар. Кини салайыытынан өрөспүүбүлүкэ хамаандата Арассыыйа чөмпүйэнээтин кыһыл көмүс мэтээллэрин ылар, хамаанданан зачекка кыайыылаах тахсар.

Агапов иитиллээччилэринэн аан дойду үс төгүллээх чөмпүйүөнэ Наталья Черноградская, Дмитрий Саввин, ону таһынан үгүс биллэр маастар-рестлердэр буолаллар.