Алексей Андреев: “Сыл устата үлэлээтибит”

Бүгүн Хаҥалас улууһугар бэлиэ тэрээһин – Тыгын Дархан пааматынньыгын уонна кини сыдьааннарыгар анаммыт мемориальнай комплексы арыйыы буолла.

Мемориальнай комплекс эскиһин оҥорбут Покровскайдааҕы оҕо художественнай оскуолатын преподавателэ Алексей Андреев кылгастык бу сүҥкэн, сонун үлэ туһунан маннык кэпсээтэ:

— Бу комплексы оҥоруунан сыл устата үлэлээтибит. Бастаан эскиһин оҥорбутум. Онтон халлаан сылыйбытын кэннэ сүрүн бырайыакпытыгар ылсыбыппыт. Ыам ыйын бастакы күннэриттэн саҕалаан баран, алтынньы ыйга силигин ситэрдибит. Сүдү бырайыагы Хаҥалас улууһун дьаһалтата үбүлээтэ. Сүрүн худуоһунньуктар уонна үлэһиттэр үһүө этибит, биһиэхэ өссө дьон көмөлөспүтэ, онон уонча буолан үлэбитин бүтэрдибит. Биллэн турар, Тыгын Дархан Саха сирин устуоруйатыгар сүҥкэн лиичинэс буоллаҕа, онон историк Прокопий Романович Ноговицыны, Г.В.Ксенофонтов аатынан  Хаҥалас улууһунаҕы кыраайы үөрэтэр түмэл үлэһиттэрин  кытта сүбэлэспитим. Ону тэҥэ “Тыгын Дархан” киинэни, литэрэтиирэ матырыйаалларын, интэриниэти, быһата, араас источниктары барытын туһанныбыт. Үлэбит түмүгэ көстүбүтүттэн олус үөрдүм.