Алексей Дзермант: «Эһиэхэ туох хамсааһыннар баралларын интэриэһиргиибин»

«ТҮМҮҮ» уопсастыбаннас мунньаҕар Белоруссияттан политолог, бөлүһүөк Алексей Дзермант эспиэр быһыытынан кытта сылдьар. Кини бу тэрээһин туһунан санаатын маннык үллэһиннэ:

— Хамсааһын саҕаламмыта, былаас өттүттэн өйөөһүн баара көстөр. Ыччакка маны барытын кэрэ көстүү, олоҕурбут үгэстэр, эстетика нөҥүө тиэрдэллэрэ суолталаах.
Билиҥҥи кытаанах утарыта турсуу кэмигэр туох туһугар охсуһарбытын, аан дойдуну хайдах көрөрбүтүн, тугу уларытыахпытын баҕарарбытын билиэхтээхпит. Маны барытын духуобунастан, сиэр-майгы сыаннастарыттан, төрүт култуураттан ылыахха сөп. Дьон маны чугастык ылынара, интэриэс баара көстөр.
Биһиги Арассыыйа чугас союзнига буоларбыт быһыытынан, эһиэхэ туох хамсааһыннар баралларын улаханнык интэриэһиргээн көрөбүн. Туох эрэ уратылаһар, ханан эрэ майгыннаһабыт, туохха эрэ эһигиттэн үөрэниэххэ сөп, ол эрээри култуура, кэрэ көстүү нөҥүө биир уопсай ситим баар. Биир уопсай тылы буларбыт суолталаах. Бу маннык кэрэни, үтүө аан дойдуну көрүүбүт хайаан да кыайыахтаах дии саныыбын.