Алексей Еремеев Арассыыйа күнүнэн эҕэрдэтэ

Ытыктабыллаах Саха сирин олохтоохторо! Саха Өрөспүүбүлүкэтин Ил Түмэнин дьокутааттарын ааттарыттан дойдубут дьоһун судаарыстыбаннай бырааһынньыгынан – Арассыыйа күнүнэн эҕэрдэлиибин!

Арассыыйа күнэ – дойдутунан, төрөөбүт сирин сайдан кэлбит баай историятынан, хатыламмат ураты култууратынан уонна үйэлээх үгэстэринэн киэн туттар дьону сомоҕолуур дириҥ ис хоһоонноох бэлиэ күн. Бу улахан суолталаах күҥҥэ ааспыт кэм быыһын арыйан, өбүгэлэрбит Ийэ дойдубут кэнэҕэс кэскилин, бөҕө туруктаах буолуутун туһугар сыралаах үлэлэринэн үтүөнү-кэрэни айан-тутан үйэлээҕи оҥорбуттарын, хорсун-хоодуот быһыыларын махтана ахтабыт. Арассыыйа көҥүлүн уонна тутулуга суох буолуутун уһансан олохторун толук уурбут, наука, култуура, искусство уонна дойдубут чэчирии сайдыытыгар дьоһун кылааттарын киллэрбит ытык дьоммут сырдык өйдөбүллэригэр сүгүрүйэбит.

Арассыыйа Федерациятын Бэрэсидьиэнэ Владимир Владимирович Путин нэһилиэнньэ олоҕун таһымын үрдэтиигэ туһуламмыт стратегическай соруктары туруорар. Сүрүн суолталаах хайысхалартан биирдэстэринэн киһи ис кыаҕын арыйыы, Ийэ дойдуга, норуокка ытыктабылынан, сөҕүрүйбэт тапталынан салайтаран, уопсастыба иннигэр эппиэтинэстээх, патриоттуу өйдөөх-санаалаах личноһы иитии буолаллар. Биһиги дойдубут бөҕөргүүрүгэр, үүнэригэр-сайдарыгар, хас биирдии олохтооҕо сарсыҥҥы күнүгэр бигэ эрэллээх, көмүскэллээх буоларыгар дьулуһабыт.

Эһиэхэ чэгиэн доруобуйаны, тус олоххутугар дьолу-соргуну, үтүө туругу, бары саҕалааһыннаргытыгар үрдүк ситиһиини баҕарабын. Дьиэ кэргэҥҥэ – ил-эйэ, оттон сүрэххэ ­модун дойдубутугар таптал өрүү баар буоллун.

Арассыыйа күнүнэн!

Саха Өрөспүүбүлүкэтин Ил Түмэнин Бэрэссэдээтэлэ А.И. Еремеев