Алексей Еремеев: «Бүгүн Саха сирин уопсастыбаннаһа өрөспүүбүлүкэҕэ биир сүрүн суолталаах күнү бэлиэтиир»

Күндү Саха Өрөспүүбүлүкэтин олохтоохторо!

Эһигини Саха Өрөспүүбүлүкэтин Ил Түмэнин аатыттан өрөспүүбүлүкэбит судаарыстыбаннаһын күнүнэн ис сүрэхпиттэн эҕэрдэлиибин!

Бүгүн Саха сирин уопсастыбаннаһа өрөспүүбүлүкэҕэ биир сүрүн суолталаах күнү бэлиэтиир. Отут биэс сыл аннараа өттүгэр — 1990 сыл балаҕан ыйын 27 күнүгэр — Саха АССР XII ыҥырыылаах Үрдүкү Сэбиэтин иккис сиэссийэтигэр дойдубут биир сомоҕо буолуутун харыстыырга, федерализм бэлиитикэтин ыытыыга, Арассыыйа Федерациятыгар федеративнай сыһыаннаһыылары сайыннарыыга олук уурбут Судаарыстыбаннай суверенитет туһунан Декларация ылыныллыбыта. Саха АССР Үрдүкү Сэбиэтин Бэрэссэдээтэлэ Михаил Ефимович Николаев Декларация ылыныллыан иннинэ эппит тылыгар Декларация тосхоло «биһиги өрөспүүбүлүкэбит бэйэтин баҕатынан РСФСР састаабыгар киирэрин уонна Сойууһунай дуогабары түһэрсиигэ кыттарын туһунан дуогабары түһэрсии быраап өттүнэн төрүтэ буолуоҕа» диэн бэлиэтээбитэ.

Судаарыстыбаннай суверенитет туһунан Декларацияны ылыныы элбэх омуктаах норуоппут олохтоох салайыныы уонна сайдыы туһунан үгүс үйэлээх ыра санаатын олоххо киллэрбит историческай суолталаах. 90‑с сыллар уустук кэмнэригэр Саха сирин олоҕо-дьаһаҕа уонна экэниэмикэтэ бигэ туруктаах буоларыгар дьоһуннаах хардыы оҥоһуллубута, уопсастыба өй-санаа, майгы-сигили өттүнэн сайдарыгар, норуоттар икки ардыларыгар иллээх-эйэлээх олоҕу түстүүргэ усулуобуйа тэриллибитэ. Оччотооҕу быһыыга-майгыга дьокутааттар халбаҥнаабат кытаанах санааларын көмөтүнэн өрөспүүбүлүкэбит уонна дойдубут инникитин үгүс сүрүн боппуруостара быһаарыллыбыттара. Судаарыстыбаннас диэн бастатан туран — төрөөбүт дойду туһугар эппиэтинэс, тылга, култуураҕа уонна төрүт үгэскэ ытыктабыллаах сыһыан, киэҥ уонна баай өрөспүүбүлүкэбит хас биирдии олохтооҕо үүнүүгэ-сайдыыга, үтүөҕэ-сырдыкка дьулуһуута.

Саха сирэ билигин — тэтимнээхтик сайдан иһэр эрэгийиэн, Арассыыйа экэниэмикэтин тирэҕэ, наука, саҥаны киллэрии уонна култуурунай олох ураты киинэ. Биһиги күүспүт –үгүс омуктаах норуот биир сомоҕо буолуутугар, Хоту сир сүдү, кэрэ айылҕатын кытта алтыһыыга, үлэҕэ тапталга уонна эйэҕэс буолууга.

Федеральнай киин биир сүрүннээх судаарыстыбаннай бэлиитикэтин уонна РФ Бэрэсидьиэнэ В. В. Путин тус бэйэтин өйөбүлүн көмөтүнэн өрөспүүбүлүкэбит дойду стратегическай суолталаах эрэгийиэнин быһыытынан туруктаахтык сайдар, бүтүн Арассыыйа экэниэмикэтин уонна научнай-технологическай күүһүн бөҕөргөтүүгэ улахан кылаатын киллэрэр. Саха Өрөспүүбүлүкэтэ күн бүгүн айылҕа баайынан эрэ буолбакка, бырамыысыланнас, тырааныспар, энэргиэтикэ, социальнай ис тутул эйгэтигэр кыахтааҕынан биллэр. 2050 сылга диэри туһаайыллар сыалы-соругу быһааран туран 2032 сылга диэри кэмҥэ Саха Өрөспүүбүлүкэтин олоҕун-дьаһаҕын уонна экэниэмикэтин сайыннарыы Стратегиятын үлэҕэ киллэрэн, бөдөҥ национальнай бырайыактары олоххо киллэрэр.

Күндү Саха сирин олохтоохторо, чуолаан эһиги төрөөбүт кыраайбыт үүнэ-сайда турарыгар сүҥкэн кылааккытын киллэрэҕит, өрөспүүбүлүкэбит уонна улуу дойдубут туһугар киэҥ хабааннаах бырайыактары олоххо киллэрэргэ көмө буолаҕыт. Бүгүҥҥү үөрүүлээх күҥҥэ эһиэхэ кытаанах доруобуйаны, дьолу, бары үчүгэйи уонна саҥа саҕалааһыннаргытыгар үрдүк ситиһиилэри баҕарабын!

Саха Өрөспүүбүлүкэтин Ил Түмэнин Бэрэссэдээтэлэ

А.И Еремеев.