Алексей Еремеев: «Владимир Путин дойду социальнай-экэнэмиичэскэй сайдыытын уонна демография боппуруостарыгар болҕомтотун ууруоҕа»

Сарсын, олунньу 29 күнүгэр, Арассыыйа Бэрэсидьиэнэ Владимир Путин РФ Федеральнай Мунньаҕар Анал этиитин оҥоруоҕа.

«Сарсын дойду Бэрэсидьиэнэ Владимир Путин РФ Федеральнай Мунньаҕар Анал этиитигэр кэлэр алта сылга сүрүн соруктары бэлиэтиэҕэ», — диэн Ил Түмэн мунньаҕын бэрэссэдээтэлэ Алексей Еремеев санаатын үллэһиннэ.

Бэлиэтээн эттэххэ, РФ Конституциятын 84-с ыстатыйатыгар сөп түбэһиннэрэн, Арассыыйа Федерациятын Бэрэсидьиэнэ сыл ахсын дойду балаһыанньатын, судаарыстыба ис уонна тас бэлиитикэтин сүрүн хайысхаларын туһунан Федеральнай Мунньаҕар туһаайан этии оҥорор. Арассыыйа Бэрэсидьиэнэ Федеральнай Мунньахха Анал этиитэ дойду сайдыытыгар олук уурар сүдү суолталаах докумуонунан буолар.

Кини онно анал байыаннай дьайыы тиэмэтэ – байыаннайдарга уонна кинилэр дьиэ кэргэттэригэр социальнай өйөбүлү, анал байыаннай дьайыы кэнниттэн байыаннайдар доруобуйаларын чөлүгэр түһэриигэ көмөнү оҥоруу туһунан хайаан даҕаны бэлиэтэниэ диэтэ. Арассыыйаҕа 2024 сыл дьиэ кэргэн сылынан биллэриллибитинэн, Анал этиигэ эдэр уонна элбэх оҕолоох ыаллары эбии өйөөһүн боппуруостара эмиэ таарыллыахтара. Владимир Владимирович Путин дойду социальнай-экэнэмиичэскэй сайдыытын уонна демография боппуруостарыгар аан дойду балаһыанньатын тупсарыыга болҕомтотун ууруоҕа.