Хаартыска: Дьулус Винокуров, Ил Түмэн пресс-сулууспата
РФ Федеральнай Мунньаҕын «Парламентская газета» таһаарыытын официальнай саайта иһитиннэрэринэн, үрүҥ көмүһүнэн эрэ буолбакка, күндү металлары кытта үлэлиир тэрилтэлэргэ нолуок судургутутуллубут тиһигин (УСН), уо.д.а. анал нолуоктары туһанарга быраабы төнүннэриэххэ наада.
Муус устар 27 күнүгэр Санкт Петербург куоракка судаарыстыбаннай сыһыаннаһыылар уонна нолуок сокуонугар сокуону оҥорооччулар Сэбиэттэрин хамыыһыйатын мунньаҕар Ил Түмэн спикерэ Алексей Еремеев ювелирнай салаа проблемаларын туһунан кэпсээтэ. Бу тиэмэҕэ РФ Налоговой кодексатыгар уларытыы киллэрэр туһунан этиини федеральнай бырабыыталыстыба көрүүтүгэр ыытарга быһаардылар.
2023 сыл тохсунньу 1 күнүгэр диэри ювелирнай салаа бары тэрилтэлэрэ нолуок эрэсиимин бэйэлэрэ талар кыахтаахтара: сүрүн, судургутутуллубут эбэтэр патеннаах. Ол эрээри, 2023 сылтан күндү металларынан дьарыктанар тэрилтэлэр нолуок сүрүн эрэсииминэн эрэ үлэлиир кыахтаммыттара.Баар балаһыанньаны 2024 сыллаахха кыратык көннөрбүттэрэ, онно УСН уонна патены талыы бырааба үрүҥ көмүһү кытта үлэлиир тэрилтэлэргэ төннүбүтэ. Ол эрээри ювелирнай оҥоһуктарынан дьарыктанар тэрлитэлэр үрүҥ көмүстэн эрэ буолбакка, атын күндү металлартан, ордук көмүстэн нолуок сүрүн эрэсиимигэр хаалбыттара.
Алексей Еремеев этэринэн, бу ырыынак бөдөҥ кыттааччыларыгар эрэ туһаны аҕалбыта. Бу сүнньүнэн сыыһа. «Көмүһү, үрүҥ көмүһү кытта үлэлиир тэрилтэлэргэ үлэ кээмэйэ, дохуот киллэриитэ ардыгар тэҥнэр. Үгүс ювелирнай киэргэллэр күндү металлартан, үрүҥ көмүстэн тураллар. Ону таһынан бөдөҥ хампаанньалар эрэллээхтик барыстаннылар, оттон дьоҕус уонна орто биисинэс ахсаана аҕыйаата. Туох баар идиэйэлэрэ, атыннык этэххэ ювелирнай ырыынак муодата кыра хампаанньаларынан оҥоһуллар», — диэн кини иһитиннэрдэ.
Алексей Еремеев статистика чахчыларын кэпсээтэ. Ол курдук, 2021 сылтан 2024 сылга диэри ювелирнай салааҕа дьоҕус уонна орто тэрилтэлэр ахсаана 60 бырыһыан аҕыйаабыт, ол кэмҥэ 2022 сылтан 2024 сылга диэри ювелирнай бородууксуйа ырыынакка 24 бырыһыанынан түспүт. Ол эрээри бу салаа сайдыытын кытта буолбакка, күндү металларга сыана үрдээһинин кытта сибээстээх.
«Ити барыта дойду иһигэр ювелирнай бородууксуйаҕа конкуреннаһар кыаҕын сарбыйар уонна тас дойдуларга таһааран атыылыыр кыаҕын хааччахтыыр», — диэн түмүктээтэ Алексей Еремеев. Кини санаатынан, бу сыл тохсунньу 1 күнүттэн бары тэрилтэлэр уонна чааһынай урбанньыттар НДС төлөөччүлэринэн буолбуттарын учуоттаан, ювелирнай ырыынакка нолуок ноҕуруускатын намтатыахха уонна бырамыысыланнаһы кытта үлэлиир дьоҕус биисинэскэ судургутутуллубут тиһигин төнүннэрэр, туһанар бырааптарын киллэриэххэ наада.
Бу ураты каарта оҕолорго төрөөбүт дойдуларын дириҥник өйдүүргэ уонна умнуллубат өйдөбүллэри бэлэхтиэҕэ. Манна Саха сирин…
Соторутааҕыта Ыксаллаах быһыы-майгы министиэристибэтин 35 сылыгар аналлаах тэрээһин Уһук Илин бастыҥ уоту кытта бохсооччуларын түмтэ.…
От ыйын 3 күнүттэн 5 күнүгэр диэри Нерюнгрига өрөспүүбүлүкэтээҕи Олоҥхо ыһыаҕа ыытылларынан сибээстээн, арыгыны атыылааһыҥҥа…
От ыйын 4-8 күннэригэр Дьокуускайдааҕы VIII норуоттар икки ардыларынааҕы киинэ бэстибээлэ ыытыллыаҕа. Быйылгы бэстибээл сүрүн…
Бүгүн Мииринэй оройуонугар баар «Саха сирин тыыннаах алмаастара» пааркаҕа («Живые алмазы Якутии») пааркаттан үөрүүлээх сонун…
Өлүөхүмэҕэ саҥа оҕо поликлиникатын үөрүүлээхтик астылар. Урут поликлиника 1980-с сыллардааҕы дьиэҕэ баар эбит. Билигин тэрилтэҕэ…