Алексей Гольдеров күөлгэ кутталлаах трюгу көрдөрүөҕэ

Дьокуускай куорат төрөөбүт күнүн бу өрөбүллэргэ номнуо бэлиэтиибит. Киин куорат 392 сылын бэлиэтиир бырааһынньыктааҕы бырагыраамаҕа иллюзионист Алексей Гольдеров Теплай күөлгэ киһи олоҕор кутталлаах трюгу оҥоруохтааҕа киирэ сылдьар. Дьэ, тугу оҥорор эбитий?

Алексей Гольдеров аан дойдуга аатырбыт маг Гарри Гудини кутталлаах нүөмэрин хатылыахтаах. Ол эбэтэр, уу анныгар буочука иһигэр сыабынан кэлгиллэн олорон, бэйэтэ ол сыаптан босхолонон тахсыахтаах.

— Мин ыйы быһа бэлэмнэнним. Түүн, хараҥаҕа, ким да көрбөт кэмигэр күөлгэ киирэн эрчиллэбин. Хаста да эрэпэтииссийэлээтим. Төһө да күһүн буоллар, үөрүйэх киһиэхэ Теплай күөл уута сылаас. Миигин буочука иһигэр уган, сыабынан кэлгийэн баран, ууга тимирдэллэр. Ол онтон босхолонон тахсыахтаахпын.  Бу нүөмэрбин тапталлаах Дьокуускай куоратым төрөөбүт күнүгэр аныыбын, — диэн Алексей СИА-ҕа кэпсээтэ.

Кутталлаах нүөмэри балаҕан ыйын 8 күнүгэр киэһэ 5 чааска Теплай күөлгэ көрүөххэ сөп. Биллэн турар, ГИМС иниспиэктэрдэрэ, миэдиктэр дьуһуурунайдыахтара.

Ааспыт сайын Таалай күөл үрдүнэн тардыллыбыт канаат устун цииркэ акробата хаампытыгар, кытылга баппат элбэх киһи мустубута. Бу да сырыыга оннук буолуон сөп.

Гарри Гудини бөтүөҥҥэ киирбитин кэннэ, толору ууну кутан баран, алта күлүүһүнэн хатыыллара. Биир көрөөччүнү ыҥыран, бэрэбиэркэлэтэллэрэ — ол киһи бөтүөнү тутан-хабан көрөрө. Бөтүөнү таҥаһынан сабан баран, көрөөччүлэри барыларын тыыннарын хаайарга көрдөһөллөрө. Улахан чаһы сөкүүндэлэри ааҕарын көрдөрөллөрө. Бириэмэ олус бытааннык барар курдуга. Биир мүнүүтэ ааспытын кэннэ, көрөөччүлэр тыыннара бүтэн, бары көрдөһөн бараллара: «Гудинины босхолооҥ, өлөрүмэҥ!». Онтон киһилэрэ бу тахсан кэлэрэ, ытыс тыаһа, ыһыы-хаһыы оргуйа түһэрэ…

Онтон биһиги фокусникпыт тымныы ууттан, күөл түгэҕиттэн  хайдах тахсыаҕай?