Алексей Иннокентьев: «Дойдуга бэриниилээх ыччаты иитиигэ болҕомто күүһүрэр»

Ньурба улууһугар байыаннай эпэрээссийэ кыттыылаахтарыгар, кинилэр дьиэ кэргэттэригэр өйөбүлү оҥорууга итиэннэ ыччаты патриотическай иитиигэ улуус баһылыга Алексей Иннокентьев тус болҕомтотун уурар. Ол кини бэйэтин аккауныгар бу хайысхаҕа ыытар үлэтин сырдатыытыттан үчүгэйдик көстөр.

— Улууска байыаннай эпэрээссийэ кыттыылаахтарыгар, кинилэр дьиэ кэргэттэригэр көмө дьаһаллара ылыллан, үлэ бара турар. Бу күннэргэ байыаннай сулууспалаах Василий Захаровы кытары көрүстүм. Бу иннинэ кини байыаннай госпитальга эмтэниини ааһан, дойдутугар кэлэ сылдьар. Билигин туруга этэҥҥэ.
Үгэс быһыытынан, саха быһаҕын, маллаах суумка туттардым.
Маны таһынан Ньурбатааҕы техническэй лицей үөрэнээччилэрин кытары «Разговоры о важном» иитэр-үөрэтэр чаас чэрчитинэн көрсөн, кэпсэттим. Манна уолаттары кытта билигин дойдубутугар буола турар быһыы-майгы, аармыйаҕа сулууспалааһын тула санаа атастаһыыта буолла.
Итини сэргэ оҕолор улуус олоҕун-дьаһаҕын интэриэһиргииллэрэ үөрдэр. Ол курдук, кинилэртэн газ кэлиитин, стадион, Набережнай, Убайаан оскуолатын, аэропорт тутуутун, Лэппириэҥҥэ автобус сырыытын, онтон да атын ыйытыылар киирдилэр.

«Разговоры о важном» чаас билигин үүнэр көлүөнэ оҕолорбутугар олус наадалаах дии саныыбын. Үөрэнээччилэр өттүлэриттэн интэриэс улахана көстөр. Онон бу өттүгэр үчүгэй былааннаах үлэ бары хайысханан кэлимник толкуйданан ыытылла туруохтаах.