Алексей Никифоров аатынан «Боотурдар оонньууларыгар» Мэҥэ Хаҥалас улууһун хамаандата бастаата

Сэтинньи 23 күнүгэр Дьокуускайга оҕону быыһыы сылдьан хомолтолоохтук өлбүт Алексей Никифоров кэриэһигэр анаммыт «Боотурдар оонньуулара» диэн саха төрүт көрүҥнэригэр өрөспүүбүлүкэтээҕи турнир ыытылынна.

Күрэхтэһиигэ муниципальнай тэриллиилэр эдэр ыччат түмсүүлэрэ кытыннылар. Мэҥэ Хаҥалас улууһун хамаандата бастыҥынан ааттанна.

Тэрээһин Бүлүү, Үөһээ Бүлүү, Ньурба, Сунтаар, Горнай, Нам, Хаҥалас, Мэҥэ Хаҥалас, Амма, Таатта, Чурапчы, Уус Алдан, Дьааҥы, Кэбээйи улуустарын сүүмэрдэммит хамаандаларын муста. Усуйаана уонна Өлөөн, Өймөкөөн уонна Эдьигээн, Анаабыр уонна Булуҥ холбоһуктаах хамаандаларынан кытыннылар.

«Турнир ХИФУ 66-с куорпуһун тустуу саалатыттан саҕаламмыта. Билигин стадион таһымыгар тиийэ улаатта. Алексей Никифоров кэриэһигэр аналлаах күрэхтэһии итинник киэҥ далааһыннаммыта миигин үөрдэр. Билигин үксүн Алексейы тыыннааҕар билбэтэх устудьуоннар тэрийэллэр. Кини түмсүү көхтөөх чилиэнэ этэ, мэлдьи көмөҕө кэлэрэ», — диэн Ыччат дьыалаларыгар уонна социальнай коммуникацияларга миниистир Петр Шамаев бэлиэтээтэ.

Физическэй култуураҕа уонна успуорка миниистири бастакы солбуйааччы Гаврил Мохначевскай Алексей Никифоров устудьуоннуур сылларыгар чаҕылхай активист, барытыгар талааннааҕын болҕомтоҕо ылла. «Алексей успуордунан дьаныардаахтык дьарыктанара, ыччаты түмэрэ, кини аатын кытта элбэх ситиһии ситимнээх. Кини оҥорбут хорсун быһыыта умнуллубат. СӨ Ил Дархана Айсен Николаев, бырабыыталыстыба, ыччат дьыалаларыгар министиэристибэ, успуорт министиэристибэтэ маннык тэрээһиннэри өйүүллэр», — диэн Гаврил Мохначевскай эттэ.

Түмүккэ Мэҥэ Хаҥалас улууһун күрэсчиттэрэ  саамай үрдүк көрдөрүүлэри ситистилэр. Кинилэр турнир кыайыылаахтарынан буоллулар. Тэрийээччилэр кинилэргэ 200 тыһыынча солкуобайы туттардылар. Иккис миэстэни ылан, 150 тыһыынча солкуобай хаһаайыттарынан Кэбээйи оройуонун бэрэстэбиитэллэрэ буоллулар. Амма улууһун сулустаах хамаандата (састаабыгар Борис уонна Гарри Сдвижковтар, Василий Захаров, Дмитрий Шестаков, Герман Устинов кыттыбыттара) боруонса мэтээллэри уонна 100 тыһыынча солкуобайы ылла.