Алексей Павлов: «Дойдуга бэриниилээх буоларга ыҥырар испэктээктэргэ үлэлиэхпит»

Ахсынньы 19 күнүгэр Арассыыйа Бэрэсидьиэнэ Владимир Путин быһа эпиирин кэмигэр бүгүҥҥү күҥҥэ уонна инники олохпутугар олус суолталаах боппуруостарга быһаарыылары истэн, Арассыыйа олохтоохторо элбэҕи биллилэр уонна санааларын үллэһиннилэр.

Саха Өрөспүүбүлүкэтин  Үүнэр көлүөнэ тыйаатырын уус-уран салайааччыта, РФ култууратын үтүөлээх үлэһитэ, СӨ норуодунай артыыһа, «Култуураҕа уонна ускуустубаҕа өҥөтүн иһин» уордьан кавалера, Ф.Волков аатынан РФ бырабыыталыстыбатын бириэмийэтин лауреата Алексей Прокопьевич Павлов:

-Дойдубут Бэрэсидьиэнэ сыллааҕы түмүктэри таһаарар пресс-кэмпириэнсийэтин олус сэҥээрэн иһиттибит. Билигин ордук долгуйар боппуруоспутунан байыаннай дьайыы хаамыыта буолар. Владимир Путин итиниэхэ туох санаалааҕын, көрүүлээҕин Арассыыйа хас биирдии олохтооҕо күүппүт буолуохтаах.
Бэрэсидьиэн Курскай уобалаһыттан Украина байыастара хайаан да тахсыахтаахтарын, байыаннай дьайыы саҕаланыытыгар ылыллыбыт сорук барыта толоруллуохтааҕын  уо.д.а. туһунан эппитигэр байыаннай дьайыы тоҕо саҕаламмытын өйдөөтүбүт.
Байыаннай дьайыы зоналарыгар сураҕа суох сүппүт саллааттарга РФ Оборонаҕа министиэристибэтин кытары сөбүлэһии түһэрсэн, саллааттар оҕолоругар туох эмэ пособие көрүллүөн сөп диэн эппитин долгуйа иһиттим. Тоҕо диэтэххэ, бэйэлэрэ да аһыылаах дьоҥҥо ити  ыарахаттары үөскэтэр, онон туох эмэ көмө баара буоллар, үчүгэй буолуо этэ. Бу этии олоххо киирэрин Сахабыт сирин дьоно эмиэ күүтэр.
Каадырдары бэлэмнээһин туһунан ыйытыыга байыаннай дьайыы кыттыылаахтарыттан дьоҕурдааах дьону салайар үлэҕэ ылар наадатын, кинилэргэ итэҕэйэрбит туһунан эттэ. Биһиги Сахабыт сирин дьоруойдара эмиэ салалтаҕа үлэлии сылдьаллар, кинилэргэ ситиһиилээх үлэни баҕарабын.
Владимир Путин волонтердарга ис сүрэҕиттэн махтанна. Сахабыт сирин волонтердара олус улахан көмөнү оҥороллорун, бэйэлэрин кылааттарын киллэрсэллэрин көрө-истэ сылдьабыт. Бары кинилэргэ махтаныах эрэ тустаахпыт.
Аҕа дойду Улуу сэриитигэр Кыайыы 80 сылын бэлиэтээһин эмиэ олус долгутуулаах буолуоҕа. Аҕаларбыт, эһээлэрбит сыдьааннара байыаннай дьайыыга баран, Ийэ дойдуларын хорсуннук көмүскүү, кыайыыны уһанса сылдьаллар. Мин эмиэ Аҕа дойду улуу сэриитин кыттыылааҕын уолабын. Аҕабыт сиэнэ байыаннай дьайыыга кыттыбыта, онон ситим быстыбат, устуоруйа төттөрү эргиллэн кэлэр… «Биһиги дьыалабыт кырдьыктаах, кыайыы биһиэнэ буолуоҕа» диэн  бары эрэнэбит. «Орешник» диэн чугас уонна орто ыраахха ытар күүстээх сэптээх-сэбиргэллээх буоллубут, онон өстөөх дойдулара тардыныа, чаҕыйыа этилэр.
В.Путин тыа сирин туһунан ыйытыыларга хоруйдаан, үлэһит илии тиийбэтин, нэһилиэнньэ дохуотун туһунан санаатын үллэһиннэ. Нэһилиэнньэ дохуоттаах буоларыттан дойдубут сайдыыта улахан тутулуктаах. «Тыа сиригэр үлэлээһин кэлэр кэскиллээх буолуохтаах, исписэлиистэр тыа сиригэр үлэлии кэлэллэригэр судаарыстыба болҕомтотун ууруо», – диэтэ. Биһиги тыабыт хаһаайыстыбата бигэ туруктаннаҕына, дохуоттаах, үлэлээх буоллахтарына, кэлэр кэнчээри ыччаттарбыт салгыы тыа хаһаайыстыбатын сайыннарыа этилэр.
Аҕа баһылыкпыт култууралар хардарыта сыһыаннарыгар тохтоон ааста, итинник хардарыта сыһыаннар экэниэмикэ сайдыытыгар төһүү күүс буолалларын бэлиэтээн эттэ. Үүнэр көлүөнэ тыйаатыра Арассыыйа уонна Кытай хардарыта сыһыаннаһыыларын чэрчитинэн Кытайга гостуруоллаан кэлбитэ, үс куорат ыччата испэктээктэрбитин олус сэргээбитэ, сөбүлээбитэ. Биһиги эмиэ Кытайы кытары доҕордоһууга далаһа ууран, култуураҕа хардарыта сибээстэһиигэ кыра кылааппытын киллэрсибиппититтэн үөрэбит. Онон В.Путин Кытай уонна Арассыыйа сыһыаннаһыыларыгар этиитин наһаа чугастык ылынабыт.
Владимир Путинтан: «Байыаннай дьайыы 3 сылын кэмигэр эйиэхэ туох уларыйыы буолла?» диэн ыйыппыттарыгар: «Бары да уларыйдыбыт, икки сылтан ордук кэм дойдубутун тургутан көрүү кэмэ буолла», — диэтэ. Кырдьык, барыбытыгар да улахан уларыйыы барда, олохпутун атыннык ылынар, урукку сыаннастары саҥаттан көрөр буоллубут. Култуура уонна ускуустуба эйгэтигэр урукку өйдөбүллэрбит уларыйан, ускуустуба айымньыларын атын харахпытынан көрөр, атыннык толкуйдуур буоллубут. Сыанаҕа үтүөнү, кэрэни сырдыгы эрэ кэрэһилиир, дойдуга бэриниилээх буоларга ыҥырар айымньылары таһарыахтаахпыт диэн үлэлии сылдьабыт.