Алексей Павлов: «Ил Дархан олох бары эйгэтин хабар ыйытыыларга сиһилии хоруйдаата»

Арассыыйа култууратын үтүөлээх үлэһитэ, Саха Өрөспүүбүлүкэтин норуодунай артыыһа, Федор Волков аатынан Арассыыйа Бырабыыталыстыбатын бириэмийэтин лауреата Алексей Павлов «Быһа лииньийэ» кэннэ санаатын үллэһиннэ:

«Сахабыт сирин бары олохтоохторун тапталлаах Өрөспүүбүлүкэбит күнүнэн истиитик-истиҥник эҕэрдэлиибин! «Быһа лииньийэҕэ» Ил Дархаммыт Айсен Николаев киирбит ыйытыыларга хоруйдуурун болҕойон иһиттибит. Дьон-сэргэ олоҕун таарыйар, билиэн баҕарар ыйытыыларыгар толору хоруйдаата.
Сэрии кыттыылааҕын уонна тыыл бэтэрээнин оҕолоро буоларым быһыытынан, сэрии кыттыылаахтарыгар, тыыл бэтэрээннэригэр, сэрии оҕолоругар уонна концлааҕырдарга эрэйдэммит-буруйдаммыт дьоммутугар болҕомто, көмө оҥоһулларыттан улаханнык үөрэбин. Ити кинилэргэ махталбыт уонна сүгүрүйүүбүт бэлиэтэ буолар.

Кыайыы күнүгэр ийэлэрбит, аҕаларбыт, эбээлэрбит, эһээлэрбит өлбөт-сүппэт мөссүөннэрин өрө тутан, «Өлбөт үйэлээх полк» аахсыйанан сэлэлии хаамыахпыт.
Байыаннай дьайыы кыттыылаахтарыгар өрөспүүбүлүкэ аатыттан көмө тохтоло суох оҥоһулла, ыытылла турар. Волонтердар госпиталларга сытар биир дойдулаахтарбытын көрүүгэ-харайыыга үлэлииллэрэ хайҕаллаах уонна махталлаах. Байыаннай дьайыы кыттыылаахтарын үлэнэн хааччыйыыга ситимнээх үлэ бара турарын туһунан Айсен Сергеевич сиһилии кэпсээтэ.

Креативнай индустрия сайдыыта Саха сиригэр күүскэ баран иһэрин кэпсээтэ. Запорожье уобалаһын кытта бииргэ «Алдан» диэн уус-уран киинэ уһуллан көрөөччүгэ тахсаары турарын иһитиннэрдэ. Итинтэн биһиги олус үөрэбит, тоҕо диэтэххэ «Алдан» киинэҕэ сүрүн оруолу биһиги Үүнэр көлүөнэбит тыйаатырын артыыһа Илья Яковлев оонньуур.

Өлүөнэ өрүһү туоруур күргэ тутуута саҕаламмытын туһунан иһитиннэриитэ Саха сирин олохтоохторун сүргэлэрин көтөҕөр. Саас уонна күһүн эбэбитин туоруур дьоҥҥо-сэргэҕэ улахан ыарахаттардаах уонна эрэйдээх буоларын бары билэбит.

Киирбит ыйытыктар ортотугар үөрүүлээх сонунунан Бүлүү куоратыгар Гавриил Иосифович Чиряевка уонна Степан Максимович Аржаковка аналлаах Судаарыстыбаннас түмэлэ тутуллуоҕа диэбитэ. Өрөспүүбүлүкэ тэриллиитигэр уонна Саха сирэ сайдыытыгар үтүмэн үтүөлээх дьоммутугар сүгүрүйүүбүт, кинилэринэн киэн туттуубут бэлиэтэ түмэл баар буолуоҕа. Ити курдук, Ил Дархаммыт өссө да элбэх, Саха сирин олохтоохторун олох бары эйгэтин хабар ыйытыктарыгар сиһилии, астыннарар хоруйдары биэрдэ».