Алексей Сырдык: «Сымнаҕас сыл кэлиэ»…

2026 сыл хайдах буолуоҕун Саха сиригэр киэҥник биллибит экстрасенс Алексей Иванович Божедонов‑Сырдык хаһыаппыт ааҕааччыларын кытары үллэһиннэ.

— Кэлэр сылга Арассыыйа да, өрөспүүбүлүкэ да бүддьүөтүгэр үп-харчы кырыымчык буолуо. Бэлиитикэ, байыаннай дьайыы туһунан эппэппин. Биһиги бэйэбит кыһалҕабытын быһаарыахтаахпыт. Эмиэ бу сыллар курдук интэриниэт, уот барыыта элбиэ. Уоппут ыстаансыйалара барыта да кэриэтэ арҕаа дойдулар тэриллэринэн оҥоһуллан тураллар, саппаас чаастара суох. Ону ыларга аан дойдуну эргитэн аҕалаллар, ол иһин бытаарар. Арассыыйаҕа сааҥсыйалар син биир баар буолуохтара. 90‑с сыллар курдук кэм кэлэн ааһыа, ол эрээри онтон сымнаһыар буолуо дии саныыбын. Онон кэлэр үс сылга дьон бэйэтигэр эрэ эрэниэхтээх. Ааспыт икки сылга курааннаабыта, кэлэр сылга быйаҥнаах дьыл буолуо, оҕуруот, сир аһа, үүнээйи, от-мас өлгөмнүк үүнүө. Оҕуруот аһын, хортуоппуйу, хаппыыстаны, оҕурсуну, о. д. а. дэлэччи үүннэрэн, кэнсиэрбэлээн хаһааныахтарын наада. Ас-үөл тиийбэт буолуутуттан айманыы буоллаҕына да, ол биһиги бэйэбит тугу да гыммакка олорорбутуттан буолуоҕа. Бу үс кырыымчык сылга киһи бэйэтигэр үлэлиэхтээх. Кыахтаах, өйдөөх дьон тыа сиригэр тахсан сүөһү-сылгы ииттэр кэмнэрэ кэллэ. Ону эрдэ өйдөөн дьаһаммыттар өрө тахсыахтара, кинилэр кэнэҕэски олоххо ситиһиилэниэхтэрэ, дойдуларыгар көмөлөһүөхтэрэ, ыарахан кэмҥэ бэйэлэрин уонна нэһилиэнньэни аһынан-үөлүнэн, табаардарынан хааччыйыахтара.

Аан дойду бэлиитикэтин ырыппакка, судаарыстыбаны кириитикэлээбэккэ, бастаан бэйэҕитин быһаарыныҥ. Бэйэҕит эккитин-сииҥҥитин дьарыктааҥ, куккутун-сүргүтүн бөҕөргөтүҥ — доруобуйаҕытын, ис туруккутун, өйгүтүн-санааҕытын сайыннарыҥ. Күн аайы чэбдик салгыҥҥа хаамыҥ, дуоһуйа сынньаныҥ, төрөөбүт дойдугутугар, сиргитигэр-уоккутугар махтана сылдьыҥ. Үөһэттэн бэйэҕитин көрүнүҥ, сайдыҥ диэн кириисис оҥороллор, биһигини дьиҥнээх олоххо төнүннэрээри. Туох буолар барыта үөһэттэн кэлэр, туһугар биһиэхэ барыбытыгар тургутуу буолар. Оттон үс сылынан сааҥсыйа уһуллуо, үп-харчы дэлэйиэ. Туруктаах олоххо төннүөхпүт. Санааҕытын түһэримэҥ, дойдубут күүскэ сайдыаҕа, уонча сылынан туруга букатын атын буолуоҕар итэҕэйиҥ.