Алексей Уваровскай уонна Кай Адамов бокс рингэтигэр киирсиэхтэрэ

«Вызов Севера» идэтийбит бокс киэһэтин чэрчитинэн, саха многоборьеһа, Дыгын оонньууларын кыайыылааҕа Алексей Уваровскай уонна Манчаары оонньууларын икки төгүллээх муҥутуур чөмпүйүөнэ Кай Адамов киирсиэхтэрэ.

Бу туһунан ЯСИА иһитиннэрэр. Бэлиэтээн эттэххэ, күрэсчиттэр иккиэн бокс рингэтигэр өссө биирдэ да официальнайдык киирсибэтэхтэрэ. Бүгүҥҥү күҥҥэ кинилэр саха многоборьетынан дьарыктаналлар уонна Дыгын оонньууларын сүүмэрдиир күрэхтэригэр кыттыахтаахтар. Ол да буоллар, ахсынньы 6 күнүгэр «Триумф» успуорт уораҕайыгар Кай Адамов уонна Алексей Уваровскай «Вызов Севера» бокс киэһэтин сүрүн киэргэлинэн буолан, бэйэ-бэйэлэрин утары туруохтара. Бу туһунан «Сахамедиа» өрөспүүбүлүкэтээҕи медиа-киинигэр ыытыллыбыт пресс-кэмпириэнсийэҕэ иһитиннэрдилэр. Урут бу киирсиини Дьокуускай куорат баһылыга, киин куорат боксаҕа федерациятын салайааччыта Евгений Григорьев биллэрбитэ. Маны таһынан, киэһэ чэрчитинэн Саха сирин идэтийбит боксердара тас дойдулартан кэлбит күрэсчиттэри кытта киирсиэхтэрэ.