Алексей Васильев: «Төрүт дойду – Арассыыйа күүһэ» пуорумҥа киһи сэргиирэ элбэх»

Бу нэдиэлэҕэ дойду тэбэр сүрэҕэр Москваҕа «Төрүт дойду – Арассыыйа күүһэ» бастакы Бүтүн Арассыыйатааҕы пуорум киэҥ далааһыннаахтык ааста. Манна барыта 7,5 тыһыынча олохтоох бэйэни салайыныы бэрэстэбиитэллэрэ кытыннылар. Оттон Саха сириттэн барыта 160 дэлэгээт, ол иһигэр 155-һэ – оройуоннар уонна нэһилиэктэр баһылыктара кытыннылар.

«Төрүт дойду – Арассыыйа күүһэ» бастакы Бүтүн Арассыыйатааҕы пуорум туһунан бэйэтин санаатын Бүлүү улууһун Халбаакы баһылыга Алексей Васильев үллэһиннэ:

— «Төрүт дойду – Арассыыйа күүһэ» муниципалитеттар бастакы пуорумнара олус үчүгэй тэрээһиннээхтик буолан ааста. Дойду бары эрэгийиэннэриттэн 7,5 тыһыынча араас таһымнаах муниципальнай тэрээһиннэр баһылыктара кэлэн кыттыыны ыллылар. Бастакы күн дойду Бэрэсидьиэнэ Владимир Путины кытары көрүстүбүт. ВДНХ-ҕа араас сиэксийэлэринэн семинардарга сырыттыбыт, эрэгийиэннэр ситиһиилэрин туһунан быыстапкалары көрдүбүт. Олус туһалаах тэрээһиннэргэ сылдьан, саҥа киирэр сокуоннар, уларыйыылар, «Бастакылар хамсааһыннара» ыччат тэрилтэлэрин, ыччат бэлиитикэтин өйөбүлүн туһунан элбэҕи биллибит-көрдүбүт. Атын эрэгийиэннэр үлэлэри-хамнастарын көрдүбүт, элбэҕи биллибит, сэргээтибит Бу сырыыбыт түмүгүнэн саҥа саҕалааһыннар олоххо киириэхтэрэ дии саныыбын.