Алена Атласова: «Эрэнэ кэтэһэбит»

Ил Түмэн дьиэ кэргэн уонна оҕо аймах дьыалаларыгар сис кэмитиэтин бэрэссэдээтэлэ Алена Атласова Саха сирэ социальнай-экэнэмиичэскэй сайдыытын өттүнэн туох эрэллээҕин уонна тугу күүтэрин туһунан санаатын үллэһиннэ:

-Былааннаммыт үлэлэр олоххо киирэллэрин илэ харахпытынан көрөбүт, мэлдьи истэбит. Аҥардас мэдииссиинэ хайысхатыгар Сахабыт сиригэр үс улахан социальнай суолталаах мэдииссиинэ эбийиэктэрэ үөрүүлээх быһыыга-майгыга үлэҕэ киирбиттэрэ: перинатальнай киин, сүрэх, тымыр ыарыыларын, искэни эмтиир балыыһалар. Бу национальнай бырайыактарынан федеральнай таһымнаах үбүлээһиннэрин сөптөөхтүк кэмигэр туһаныыга Сахабыт сирэ дойдубут эрэгийиэннэрин ортолоругар үһүс миэстэни ылар.
Эрэнэ күүтэбит, бастакытынан, саамай тыын боппуруоһунан хас эмэ сыллар устата күүтүллэр, Сахабыт сиригэр экэнэмиичэскэй уонна инфраструктуурунай суолталаах Өлүөнэ муостатын тутуутун үбүн-харчытын боппуруоһа быһаарылларын. Салгыы дойду бырабыыталыстыбатыгар туһааннаах сорук бэриллэн, тутуу үлэлэрин тэтимэ түргэтииригэр бигэ эрэллээхпит. Иккиһинэн, сыстыганнаах ыарыылары эмтиир балыыһабыт тутуллан биир эмиэ мэдииссинэ хайысхата салгыы сайдарыгар баҕарабын. Арассыыйа таһымыгар Сахабыт сирэ демографическай бэлиитикэҕэ оҕо төрөөһүнүгэр үчүгэй көрдөрүүлээхпит. Онон элбэх оҕолоох дьиэ кэргэттэри өйүүргэ өрөспүүбүлүкэҕэ эбии федеральнай үп-харчы көрүллэрэ буоллар диэн баҕа санаалаахпын.