Алена Атласова: «Сомоҕолоһуу — норуот күүһэ»

Бүгүн, ахсынньы 19 күнүгэр, Ил Дархан Айсен Николаев Ил Түмэҥҥэ сыл аайы ыытыллар Анал этиитин иһитиннэриэҕэ.

Ил Түмэн дьиэ кэргэн уонна оҕо-аймах дьыалаларыгар сис кэмитиэтин бэрэссэдээтэлэ Алена Атласова санаатын үллэһиннэ:
-Ил Дархан Айсен Николаев бүгүн Анал этиитин бары долгуйа кэтэһэбит. Лоп курдук биир сыл анараа өттүгэр, 2022 сылы Айсен Николаев Саха Өрөспүүбүлүкэтигэр ийэ үрдүк аатын уонна ийэ буолуу суолтатын өрө таһааран, өрөспүүбүлүкэ тэриллибитэ 100 сылын бэлиэтиир үбүлүөйдээх бэлиэ сылы Ийэ сылынан биллэрбитэ. Бэлиэ сыл иитинэн, Өрөспүүбүлүкэ 100 сыллаах үбүлүөйүнэн анал тэрээһиннэр, элбэх үлэ-хамнас далааһыннаахтык, тиһиктээхтик, өрө көтөҕүллүүлээхтик ыытылынна.

2022 сыл Ийэ сылыгар анаммытын бары сэргии, улаханнык үөрэн истибиппит. Үбүлүөйдээх сылга Ил Дархан «100 сыл оҕолоро» диэн 100 тыһыынча солк. суумалаах тус сыаллаах хапытаалы дьиэ кэргэттэргэ бэлэх, көмө быһыытынан бэриллэрин олохтообута. Ол курдук, үбүлүөйдээх сылга төрөөбүт хас биирдии оҕо “Сүүс сыл оҕото” тус сыаллаах 100 тыһыынча солкуобайдаах хапытаалы ылар.

Маны сэргэ, тулаайах, төрөппүт көрүүтэ-истиитэ суох хаалбыт оҕолор боппуруостарыгар, иитэ ылар дьиэ кэргэн ахсаанын элбэтиигэ болҕомто улаатар, өйөбүл оҥоһуллар. Тулаайах оҕолору көрөр-харайар, иитэр ыалларга төлөбүр икки төгүл үрдээбитэ. (Оҕону иитэ ылбыт төрөппүккэ оҥоһуллар төлөбүр базовай кээмэйин икки төгүл улаатыннарары көрөр Саха Өрөспүүбүлүкэтин сокуона 2022 сыл бэс ыйын 14 күнүгэр ылыллыбыта).
Маны таһынан, элбэх оҕолоох дьиэ кэргэттэргэ дьиэни-уоту тупсарыыга үлэ саҕаланна.

Ол курдук, бастакытынан, биэстэн элбэх оҕолоох ыаллар дьиэлэрин-уоттарын усулуобуйаларын тупсаралларыгар баар көмөҕө уочараты түргэтэтиигэ сорук туруоруллан, бырабыыталыстыба үлэ ыыппытын түмүгэр, «дорожнай карта» диэн оҥоһулунна. Иккиһинэн, босхо бэриллэр сир боппуруоһа эмиэ туспа кыһалҕалардаах. Ол курдук, ыаллар уочаракка туруулара уһун. Ону түргэтэтэр, тэтимирдэр сорук туруоруллубута. Ол туһуттан, кэлэр сылтан ыла, холобур, ыаллар уочаракка турар кэмнэригэр бу кыһалҕаларын быһаарыммыт буоллахтарына (уочараттан тахсар түгэннэригэр), дьиэлэрин-уоттарын тупсаралларыгар сыаллаах харчы көрүллэр буолла. Ити хайысхаларга норуот дьокутааттара хонтуруолу намтаппакка салгыы үлэлэһэр былааннаахпыт.

Ил Дархан «Байыаннай сулууспалаахтар дьиэ кэргэттэрин өйүүр миэрэлэр туһунан» ыйааҕынан, мобилизацияҕа ыҥырыллыбыттар, баҕа өттүнэн хантараагынан барбыттар уонна анал байыаннай эпэрээссийэ кыттыылаахтарын дьиэ кэргэттэрин өйүүр миэрэлэр ылыллыбыттара. Бу ыйаах биһиги Сахабыт сиригэр дьиэ кэргэн ураты суолталааҕын, ис хоһооннооҕун өссө биирдэ дакаастыыр.

Түмүкпэр, мин саныахпар, бу кэлэр сылы, холобур, Сомоҕолоһуу сыла диэн ааттыахха эмиэ сөп дии саныыбын. Тоҕо диэтэххэ, ааспыт сылга ойуур баһаардара, быйылгы сыл Сахабыт сирин дьоно түмсүүлээҕин, күүскэ сомоҕолоһорун көрдөрдө.

Бары бу курдук сомоҕолоһон сырыттахпытына, бу балысханнаах кэми этэҥҥэ ааһыахпыт уонна Сахабыт сирин сайдар кэскиллиэхпит .