Алена Татаринова Соҕуруу Африкаҕа ультрамарафоҥҥа сүүрүөҕэ

Бэс ыйын 8 күнүгэр Соҕуруу Африкаҕа  Comrades Marathon диэн  ультрамарафон 98-с төгүлүн ыытыллыаҕа. Манна Арассыыйаттан сыллата уонча сүүрүүк кыттар. Быйыл Саха сириттэн үс сүүрүүк бэлэмнэнэр — марафоҥҥа Арассыыйа успуордун маастара Алена Татаринова уонна сүүрүүнэн сөбүлээн дьарыктанар Ольга Винокурова, Байан Васильев. Бу туһунан «Спорт Якутии» саайт иһитиннэрэр.

Алена Татаринова 89 км уһуннаах марафону сүүрүөҕэ. Бу кини сүүрэр марафоннарыттан икки төгүл уһун буолар. Спортсмен 42,1 км уһуннаах классическай марафоҥҥа Арассыыйа үрүҥ көмүс уонна боруонса призердарынан, «Белые ночи» норуоттар икки ардыларынааҕы марафон кыайыылааҕынан буолар.

Саха сириттэн бастакынан «Комрадс» марафоҥҥа 1997 с. Николай Бускаров сүүрбүтэ. Оттон 2005 с. Татьяна Жиркова 89 км уһуну 5:57:50 көрдөрүүлээх кэлэн, кыайыылааҕынан буолбута.