«Алгыстаах саха үҥкүүтэ» кэнсиэртэн -– сааскылыы сандааран

Саха сирин төрүт култууратыгар, норуот үҥкүүтүгэр сүгүрүйээччилэргэ олунньу ый бүтэһик күнэ кэрэ-бэлиэ, умнуллубат түгэни бэлэхтээтэ.

Олунньу 27 күнүгэр Дьокуускай куорат олохтоохторо уонна ыалдьыттара Былатыан Ойуунускай аатынан Саха тыйаатырыгар бу сырыыга саҥа испэктээги көрө буолбакка, үҥкүү умсулҕаныгар уйдара кэллилэр. Бу күн Култуура уонна ускуустуба Арктикатааҕы судаарыстыбаннай институтун (АГИКИ) кэлэктиибин айар киэһэтэ буолла. Чуолаан, искусствоведение доктора, хореография бэрэпиэссэрэ, РФ ускуустубатын үтүөлээх диэйэтэлэ Ангелина Лукина үөрэнээччилэрэ уонна кини айар үлэтин утумнааччылар -– хореография 20-тэн тахса кэлэктиибэ биир сыанаҕа таҕыста.
Ангелина Григорьевна 50 сыл уһуйааччынан үлэлээбитин тухары тыһыынчанан хореографтары, культурологтары, орто уонна үрдүк таһымнаах преподавателлары бэлэмнээн таһаарда.

Кэнсиэр Иван Васильев-Алгыс Уйбаан алгыһынан саҕаланна. Ол кэнниттэн Сергей Зверев-Кыыл Уолун аатынан Үҥкүү национальнай тыйаатырын, АГИКИ уонна М.К.Аммосов аатынан Хотугулуу-Илиҥҥи федеральнай университет «Аар-аартык», «Күндэл», «Уран», «Өркөн», «Долун», «Тетрис», «Сюрприз» үҥкүү кэлэктииптэрэ , Суорун Омоллоон аатынан Опера уонна балет тыйаатырын балетын артыыстара бииртэн биир нүөмэрдэри толордулар. Монголияттан сылдьар АГИКИ устудьуона Оргилбаяр Нямжава монголлуу үҥкүүтэ көрөөччүлэри истиэп киэҥ киэлитигэр киллэрэн ылла.
Бииртэн биир наҕыл уонна тэтимнээх үҥкүүнү көрө олорон, Ангелина Лукина саха хореографиятыгар ураты уонна хатыламмат, дириҥ ис хоһоонноох суоллааҕын сөҕө-махтайа көрөҕүн. Хас биирдии туруоруу эйигин былыргы дьыллар мындааларыттан саҕалаан, билиҥҥи олохпутугар тиийэ саха үҥкүүтэ хайдах курдук сайдан кэлбитин итэҕэтэр. Толорооччуларбыт, үҥкүүһүт уолаттарбыт-кыргыттарбыт да бииртэн биир кэрэлэрэ, нарыннара, эдэрдэрэ хараҕы манньытар. Ону сэргэ, мин санаабар, көрөөччү үксэ үҥкүүһүттэр таҥастарыгар болҕомтотун уурбут буолуохтаах. Сүүрбэччэ кэлэктиип сыанаҕа тахсан үҥкүүлээбитин тухары бары киһи хараҕа халтарыйар мааны көстүүмнэрдээхтэр. Этэргэ дылы, биир да бэйэтигэр үүт үкчү майгыннаһар көстүүмү көрбөккүн. Бу эмиэ саха таҥаһа олус сайдыбытын, үҥкүүһүт таҥаһыгар улахан болҕомто уурулларын, салалта онуоха үбү-харчыны уйунарын хайгыы көрөҕүн. Чахчыта да, саха үҥкүүтэ саха норуотун олоҕун-дьаһаҕын, майгытын-сигилитин биир сиэркилэтэ буоллаҕа.

Кэнсиэр бүтүүтэ үрдүк   сыанаҕа тахсан Ангелина Григорьевнаҕа   истиҥ эҕэрдэлэрин тириэртилэр, тустаах наҕараадалары туттардылар. Онтон көрөөччү  Ангелина Лукина сүҥкэн үлэтигэр махтанан уонна алгыстаах саха үҥкүүтүттэн сүргэтэ көтөҕүллэн, сааскылыы сандааран таҕыста.

Саргылаана ИГНАТЬЕВА, АГИКИ ректора:
-Ангелина Григорьевна салалтатынан норуот култууратын салаатыгар аҕыйах ахсааннаах төрүт норуоттар үрдүк таһымнаах каадырдарын бэлэмнээһин киэҥ хабааннаахтык барар. Институт үөрэтэр уонна научнай-чинчийэр үлэтигэр Ангелина Лукина Хотугу сир норуоттарын хореографиятын чинчийиилэрин үҥкүү ускуустубатыгар чаҕылхайдык киллэрбитэ. Элбэх ансаамбыл ортотугар кини төрүттээбит «Аар Аартык» норуот кэлэктиибэ ураты миэстэни ылар, АГИКИ сирэйинэн (визитнай карточкатынан) буолар. Бу ансаамбыл туруоруулара аан дойдуга биллибиттэрэ, онтон үөрэнээччилэр саҥа кэлэктииптэри тэрийэллэр, үөрэнээччилэригэр үгэс буолбут сыаннастары иҥэрэн, Саха сиригэр уонна дойду атын эрэгийиэннэригэр хореография ускуустубатын сайыннараллар.
Ангелина Лукина саха этнохореографиятын култуурунай нэһилиэстибэтин харыстааһыҥҥа уонна сайыннарыыга кылаата тугунан да сыаналаммат.

Быһаарыы:
 Ангелина Лукина —  Хотугу сир, Сибиир уонна Уһук Илин норуоттарын этнохореографияларын чинчийээччи. Арктика төрүт норуоттарын үгэс буолбут үҥкүүлэрин үөрэтиигэ сүҥкэн үлэлэри оҥорбут Арассыыйа сүрүн учуонайдарыттан биирдэстэрэ, этнохореографияҕа элбэх монография ааптара, АГИКИ бэрэпиэссэрэ, институкка хореографияҕа саха оскуолатын тэрийээччилэртэн биирдэстэрэ.