Алгыстаах сахабыт тылын өрөгөйдөөх күнүнэн сэргэх тэрээһин ыытылынна

Олунньу 13 күнугэр Ф. И. Авдеева аатынан Оҕо айымньытын дыбарыаһыгар Төрөөбүт тыл уонна сурук-бичик күнүгэр аналлаах декада чэрчитинэн «Дьокуускай куорат» куораттааҕы уокурук үөрэх тэрилтэлэригэр тыл эйгэтин саҥардыыга уонна тупсарыыга аналлаах үөрэх сессията буолан ааста.  

Тэрээһини Дьокуускай куорат үөрэҕин управлениетын үөрэх сайдыытын отделын салайааччыта Ольга Петровна Сухаринова иилээн-саҕалаан ыытта. Манна эбии үөрэхтээһин педагогтара, уһуйааннар сахалыы бөлөхтөрүн иитээччилэрэ,  методическай холбоһуктар салайааччылара, саха тылын, литературатын уонна культуратын учууталлара кытыннылар. Куорат уһуйааннара  оҕону сахалыы иитиигэ туттар баай ис хоһоонноох матырыйаалларын быыстапкатын тэрийдилэр. Кыра саастаах оҕоҕо өбүгэ төрүт дьарыгын, үгэһин көрдөрөр, билиһиннэрэр араас оҥоһуктар, оонньуулар, мал-сал бааллара көрөөччү болҕомтотун тартылар. Сылдьыбыт дьон саха остуоруйатын, олоҥхотун  геройдарын, ис хоһоонун билиһиннэрэргэ анаан уһуйаан иитээччилэрэ олус кэрэхсэбиллээх куукулалары араас матырыйаалтан оҥорбуттарын хайҕыы, сөҕө-махтайа көрдүлэр. Бу быыстапка куорат уонна куорат таҺынааҕы уһуйааннарга сахалыы иитиигэ киэҥ, көдьүүстээх үлэ барарын итэҕэттэ.

Тэрээһин сүрүн чааһа куорат саха тылын, литературатын, төрүт култууратын учууталларын«Алгыстаах сахам тыла»  общественнай түмсүүтүн салайааччыта Марианна Николаевна Борисова алгыһынан саҕаланна. Эҕэрдэ тылы Дьокуускай куорат үөрэҕин управлениетын начальнигын солбуйааччыта Мария Владимировна Ли-цай эттэ. Төрөөбүт тылынан уһуйар, үөрэтэр педагогтар, учууталлар сыралаах үлэлэрин бэлиэтээн туран, үөрэх управлениетын бочуоттаах грамоталарын, махтал суруктарын туттарда. Бүгүҥҥү күн бэлиэ түгэнинэн Дьокуускай куорат Саха политехническай лиссиэйин уонна Айыы Кыһатын  саха тылын, литэрэтиирэтин учууталларыгар Майя Виссарионовна Осиповаҕа, Светлана Афанасьевна Липатоваҕа Саха Өрөспүүбүлүкэтин “Саха АССР 100 сыла” үбүлүөйдээх анал бэлиэни туттарыыта буолла.

Сахалыы эйгэни дьиэ кэргэҥҥэ, уһуйааҥҥа, оскуолаҕа, эбии үөрэхтээһин тэрилтэлэригэр сөптөөх хайысханы тутуһан таба тэрийии туһунан бэрт көхтөөх кэпсэтии ааста. Манна Вера Никитична Старкова, 70 №-дээх «Кэрэчээнэ» оҕо уһуйаанын эбии үөрэхтээһиҥҥэ педагога; Зоя Алексеевна Шишигина, 21 № дээх «Кэнчээри» оҕо сайдар киинин төрөппүт комитетын председателэ; Антонина Афанасьевна Неустроева, 82 № дээх «Мичээр» оҕо сайдар киинин сүрүннүүр иитээччитэ; Кристина Олеговна Иванова, «Кэскил» хаһыат, «Бэлэм буол» сурунаал корреспондена; Ангелина Афанасьевна Кузьмина, Национальнай библиотека үрдүкү научнай үлэһитэ; Татьяна Семеновна  Винокурова, “Ф. И. Авдеева аатынан оҕо айымньытын дыбарыаһа” директорын солбуйааччыта; Наталья Ивановна Руфова, СӨ Култууратын туйгуна, Тускул КК түмсүүлэрин салайааччыта; Алексей Дмитриевич Осипов, эбии үөрэхтээhин педагога бэйэлэрин үлэлэрин сырдаттылар, санааларын эттилэр. Дьокуускай куорат оскуолаларын саха тылын, литэрэтиирэтин, култууратын учууталларын үлэлэрин, инники соруктарын туһунан “Алгыстаах сахам тыла” түмсүү салайааччыта Марианна Николаевна Борисова кэпсээтэ.

Төрөөбүт тыл уонна сурук-бичик күнүгэр аналлаах тэрээһин өрөгөйдөөх оһуокайынан түмүктэннэ.

Ульяна Васильевна Заболоцкая,

«Алгыстаах сахам тыла»

Дьокуускай куорат саха тылын, литературатын уонна

култууратын учууталларын түмсүүтүн чилиэнэ.