Алимеҥҥа иэһин төлөөрү хантараак баттаспыт

Мииринэй олохтооҕо алимеҥҥа иэһин төлөөрү байыаннай сулууспаҕа хантараак баттаспыт. Бу туһунан СӨ Суут бириистэптэрин управлениета иһитиннэрдэ.

Уһун кэмҥэ эр киһи сааһын ситэ илик оҕотугар алимент төлөөбөккө куотуна сылдьыбыт. Инньэ гынан иэс  уопсай кээмэйэ  600 тыһ. солк. тиийбит.

Алименын төлөөбөт аҕа административнай эппиэтинэскэ тардыллыбыт, аны ол кэннэ киниэхэ холуобунай дьыала  тэриллибит.

Эр киһи  силиэстийэ кэмигэр эбэһээтэлистибэлэрин толорорго бэлэмин биллэрбит итиэннэ Оборона министиэристибэтин кытары байыаннай дьайыыга кыттыыга хантараак түһэрсибит. Онон сокуон быһыытынан эр киһиэхэ холуобунай дьыала тохтотуллубут.