Алимеҥҥа иэстээх айдааран административнай эппиэтинэскэ тардылынна

Суут бириистэптэрин управлениетын Алданнааҕы отделыгар 32 саастаах эр киһиттэн алимеҥҥа иэһин ирдииргэ үлэ ыытыллар, диэн Суут бириистэптэрин сулууспата суруйар.

Суут быһаарыытынан эр киһи 4 саастаах кыыһын иитиитигэр алимены төлүөхтээх эбит, ол эрээри бу сыл кулун тутар ыйыттан счекка харчыны ыыппатах. Ол иһин иэстээҕи тырааныспары салайар быраабын хааччахтаабыттар. Бу туһунан билэн, эр киһи суут бириистэптэрин отделларыгар тиийэн айдаан таһаарбыт.

Дуоһунастаах сирэй сокуоннай үлэтигэр мэһэйдээбитинэн суут үлэтин бэрээдэгин хааччыйар суут бириистэбэ РФ Административнай кэһиилэр туһунан кодексатын 17.8 ыстатыйатыгар сөп түбэһиннэрэн административнай боротокуолу толордо. Административнай кэһии матырыйааллара суут көрүүтүгэр ыытылыннылар.