Алиса Егорова: «Оҕо төрөөһүнэ элбиирэ — өрөспүүбүлүкэ сайдан иһэрин туоһута»

Соторутааҕыта Туймаада ыһыаҕын кэмигэр Ил Дархан Айсен Николаев өрөспүүбүлүкэ нэһилиэнньэтэ 1 мөлүйүөн ахсааны ситтэ, Мииринэй оройуонугар олорор эдэр ыал Онуфриевтарга мөлүйүөн ахсаанынан кыыс оҕо төрөөтө диэн  иһитиннэрбитэ. Бу үөрүүлээх сонун туһунан өрөспүүбүлүкэ олохтоохторо бэйэлэрин санааларын үллэстэллэр.

Алиса Васильевна Егорова, Ньурбатааҕы Ускуустуба оскуолатын уһуйааччыта:

— Өрөспүүбүлүкэбит сайдан, олох хаамыыта тупсан, оҕо-уруу тэнийэн иһэрэ үтүөҕэ эрэ буоллаҕа. Бу сурахтан бары да үөрдүбүт, санаабыт көтөҕүлүннэ. Манна инникини өтө көрөн үлэлээн, Ил Дархаммыт Айсен Сергеевич кыһамньыта улаханнык биллэр.

Оҕолору уһуйар-үөрэтэр киһи быһыытынан, үүнэр көлүөнэҕэ, оҕолоох дьиэ кэргэттэри өйүүргэ болҕомто уурулларын, көмө оҥоһулларын бэлиэтиэм этэ. Элбэх социальнай эбийиэк тутулунна. Төрөөһүн элбиирэ бу кэлим үлэ түмүгэ буолар дии саныыбын. Өрүү үүнэ-сайда турдарбыт, олохпут инникилээх буолуо этэ.