Алквиад Иванов —  Бүтүн Арассыыйатааҕы куонкурус кыайыылааҕа

Мэдиссиинискэй үлэһит (медбрат) Алквиад Иванов  “Орто мэдиссиинискэй уонна фармация үөрэхтээх бастыҥ исписэлиис” диэн  Бүтүн Арассыыйатааҕы куонкурус “Идэҕэ бэриниитин иһин” номинациятын кыайыылааҕынан буолла.

Куонкурус быйыл 8 номинациянан ыытылынна. Алквиад Иванов Бүтүн Арассыыйатааҕы улахан куонкуруска Саха сириттэн орто мэдиссиинискэй идэлээх исписэлиистэртэн бастакы кыайыылаах буолбута ордук суолталаах. Урут Саха сириттэн кыайыылаахтар ортолоругар быраастар эрэ баар буолаллара.

Дьокуускайдааҕы килиниичэскэй  балыыһа кылаабынай медбрата, “Сиэстэрэ үлэтин салайыы” уонна “Сиэстэрэ дьыалатын тэрийии” идэлэргэ үрдүк категориялаах исписэлиис Алквиад Иванович Иванов – РФ уонна СӨ доруобуйатын харыстабылын туйгуна, РФ уонна СӨ доруобуйатын харыстабылын үтүөлээх үлэһитэ, өрөспүүбүлүкэ фармациятын туйгуна, бочуоттаах донор, “Үлэ киһитэ” бириэмийэ хаһаайына. Билигин кини салалтатынан элбэх хайысхалаах балыыһаҕа  570 орто уонна 224 алын сүһүөх  мэдиссиинискэй үлэһит дьон доруобуйатын туһугар үлэлии-хамсыы сылдьар.