“Аллайха” община көмөлөстө

Ааспыт нэдиэлэҕэ СӨ Тыатын хаһаайыстыбатын уонна ас-үөл бэлиитикэтин министиэристибэтэ (миниистир А.Александров) “Саха сирин балыга” быыстапка-дьаарбаҥканы тэрээһиннээхтик ыыппыта.

Дьаарбаҥка чэрчитинэн “Аллайха” община баһылыга Иван Иванович Рожин уонна община үлэһитэ Михаил Александрович Колесов 500 киилэ балыгы “Вместе – мы сила” волонтерскай ыстаапка биэрбиттэр. Байыаннай дьайыыга сылдьар байыастарга уонна кинилэр дьиэ кэргэттэригэр көмөлөһөр сыаллаах.

— Балыгы байыастар Дьокуускайга олорор дьиэ кэргэттэригэр, Хабаровскайга госпитальга эмтэнээччилэргэ уонна Норуодунай фроҥҥа тиэрдиэхпит. Кинилэргэ община урукку баһылыга Бережнов Сергей Владимирович бу олохтон туоруу илигинэ үгүстүк көмөлөспүтэ, — диэн волонтердар суруйдулар.

Онон “Аллайха” община үтүө холобуру көрдөрдө.