Аллайыаха улууһун Чокурдааҕар 275 миэстэлээх оскуола үлэлээтэ

Бугүҥҥү күҥҥэ диэри Аллайыаха Чокурдааҕар оскуола үөрэнээччилэрэ 1985 сыллааҕы эргэ мас дьиэҕэ үөрэммиттэрэ. Билиҥҥи тутуллубут саҥа эбийиэк 5 тыһ. кв. миэтэрэ иэннээх уонна 275 миэстэлээх.

Итини сэргэ Эбээн-Бытантай улууһугар Баатаҕай нэһилиэгэр 220 миэстэлээх саҥа оскуола үлэҕэ киирдэ.

Амма оройуонун Абаҕа сэлиэнньэтигэр оскуола-оҕо уһуйаана 150 уонна 75 миэстэлээх аһылынна. Кэбээйи улууһун Сайылык нэһилиэгэр 275 миэстэлээх оскуола аанын астылар, оттон Таатта улууһун Туора Күөлүгэр 50 миэстэлээх оҕо уһуйаана аһылынна. Ону таһынан Дьокуускай 26 №-дээх оскуолатын үөрэнээччилэрэ үөрэх тэрилтэтин сүрүн дьиэтигэр эбии тутуу эбийиэгинэн туһанар кыахтаннылар.

Ил Дархан Айсен Николаев этэринэн, оскуола саҥа дьиэлэрин тутуута тупсаҕай усулуобуйаҕа хаачыстыбалаах үөрэх хааччыйыытын кыһалҕатын быһаарарга кыах биэрэр.

Хаартыска: СИА