Аллайыахаҕа кыыл ииримтийиитигэр тугу иһитиннэрдилэр?

СӨ Бэтэринээрийэҕэ департамена иһитиннэрбитинэн, Аллайыаха оройуонугар ииримтийиигэ икки эпизоотическай очаг баара билиннэ.

Бу иннинэ, ыам ыйын 5 күнүгэр, ыт оҕото ииримтийиигэ кырсаттан сыстыбытын туһунан суруйбуппут.  Ол курдук икки учаастактан анаалыска боруобалар ылыллан, Саха сирин өрөспүүбүлүкэтээҕи бэтэринээринэй-чинчийэр лабораториятыгар дьиикэй кырсалартан ылыллыбыт түөрт анаалыс чинчийиигэ аҕалыллыбыт.

Анаалыс түмүгүнэн, икки анаалыс боруобатыгар ииримтийии ыарыы баара көстүбүт. Чокурдаахтан чугас учаастактарга куруук олорор нэһилиэнньэ суох эбит. Онон билигин бэтэринээрдэр кыыл ииримтиийитин бохсорго үлэлэһэ сылдьаллар. Эмп-томп барыта тиийэр диэн кинилэр иһитиннэрбиттэр.