Аллараа Бэстээх балыыһатын хайгыыллар

Мэҥэ Хаҥалас улууһугар Аллараа Бэстээххэ саҥа балыыһа аһыллыбыта ый буолла.

Бу 1,2 тыһ. кв.м. тахса иэннээх мэдиссиинэ эбийиэгэ РФ Бэрэсидьиэнэ В.Путин көҕүлээбит «Уһун уонна көхтөөх олох» национальнай бырайыак чэрчитинэн тутуллубута. Учаастактааҕы балыыһаҕа улахан дьон, оҕолор көрдөрөллөр. Икки мэндиэмэннээх балыыһаҕа бастакы этээһигэр тастан эмтэнээччилэр, терапевт отделениетын дьону көрөр хоһо, күнүскү стационар бааллар. Иккискэ — 15 куойкалаах терапевт отделениета баар. Амбулаторнай отделениетыгар педиатр, терапевт, тиис бырааһын, гинеколог хосторо, ону сэргэ процедурнай хос үлэлииллэр.

Аллараа Бэстээх учаастактааҕы балыыһатын сэбиэдиссэйэ Евгения Захарова балыыһа аһылларын кэлэктиип өр кэтэспитин бэлиэтиир:

—Биһиги балыыһабыт доруобуйа харыстабылын бастакы сүһүөх звенотун сайыннарыыга туһуламмыт «Уһун уонна көхтөөх олох» национальнай бырайыак чэрчитинэн аһыллыбыта. Бу дьоһун бырайыагы олоххо киллэрэргэ өйөбүлүн, көмөтүн иһин Ил Дархаҥҥа Айсен Николаевка улаханнык махтанабыт. Үлэ бастакы ыйыттан олохтоохтор хаачыстыбалаах мэдиссиинэ көмөтүн ылаллар. Кэлэктиипкэ 40 киһи үлэлиир. Итинтэн 9 быраас: 3 учаскуобай терапевт уонна стационарга үлэлиир 1 терапевт-быраас, ону сэргэ 3 педиатр. Өссө тиис бырааһа уонна гинеколог-быраас бааллар. Иккис мэндиэмэҥҥэ 15 куойкалаах күннэри-түүннэри үлэлиир стационардаахпыт. Стационарга доруобуйаларыгар хааччахтаах пациеннарга туспа хостоохтор, анал оронноохтор, ороннорун таһыгар монитор, дефибриллятор бааллар.

Мэдиссиинэ суһал көмөтүн отделениетыгар түөрт биригээдэ үлэлиир. Биэлсэрдэр, мэдиссиинэ сиэстэрэлэрэ, суоппардар бааллар. Кинилэр Аллараа Бэстээх олохтоохторун уонна аттынааҕы Павловскай бөһүөлэгин көрөллөр. Саҥа балыыһабыт аһылларын өр күүппүппүт. Онон билигин үөрүүбүт улахан. Үлэлиир усулуобуйа биллэ тубуста. Балыыһабыт саҥа миэбэлинэн, тиэхиньикэнэн, мэдиссиинэ тэрилинэн толору хааччыллыылаах. Дьон-сэргэ доруобуйатын туһугар бары кыһамньыбытын ууран үлэлиибит, — диэн этэр Евгения Захарова.

Тиис бырааһа Гавриил Прудецкай урукку балыыһаҕа тымныы уонна эргэ тэрилинэн тутта сылдьыбыттарын кэпсиир. Онтон саҥа дьиэҕэ үлэлииргэ табыгастааҕын, манна барыта аныгы үйэ ирдэбилигэр эппиэттиирин бэлиэтиир.

—Манна Арассыыйаҕа оҥоһуллубут саҥа тэрил туруорулунна. Маны сэргэ портативнай рентген-аппарааттаахпыт уонна саҥа компьютердаахпыт. Уопсайынан, балыыһа үлэһиттэригэр да, пациеннарга да табыгастаах, үчүгэй буолла. Билигин пациеннар интерактивнай информационнай истиэндэ көмөтүнэн приемҥа суруйтараллар уонна ыйыллыбыт чааһыгар кэлэллэр. Онон уочарат диэн суоҕун кэриэтэ, өр күүппэттэр. Манна тиис бырааһынан 2017 сылтан, үөрэхпин бүтэриэхпиттэн кэлэн үлэлиибин, — диэн кэпсиир Гавриил Прудецкай.

Бөһүөлэк олохтоохторо саҥа балыыһа тутуллубутуттан үөрэллэр. Розалия Константинова саҥа балыыһа дьон-сэргэ сылдьарыгар табыгастаах миэстэҕэ тутуллубутун бэлиэтиир.

—Биһиги быраастарбыт манна үлэлииллэригэр үчүгэй бөҕө буоллаҕа. Олохтоохторго да үөрүүлээх. Балыыһаттан чугас буоламмыт биһиэхэ табыгастаах. Бөһүөлэк киинигэр турар диэххэ сөп. Онон олохтоохтор бары да абыраннахтара. Биһиги өрөспүүбүлүкэбит салалтатыгар, Ил Дархаммытыгар Айсен Николаевка, РФ Бэрэсидьиэнигэр Владимир Путиҥҥа махталбыт улахан, — диэн Розалия Константинова үөрүүтүн үллэстэр.

Кэнники биэс сылга Саха сиригэр сүүстэн тахса мэдиссиинэ эбийиэгэ үлэҕэ киирдэ. Бу түмүк барыта «Доруобуйа» уонна ону салгыыр «Уһук уонна көхтөөх олох» бырайыактары олоххо киллэрии көмөтүнэн ситиһилиннэ. Чугастааҕы биэс сылга эрэгийиэҥҥэ өссө 57 мэдиссиинэ эбийиэгин — поликлиникалары, стационардары, биэлсэр-акушер пууннарын тутан киллэрии, ону тэҥэ тэрилтэлэри аныгы саҥа тэриллэринэн салгыы хааччыйыы былааннанар.

Сиһилии: https://www.sakha.gov.ru/news/19363

СӨ Ил Дарханын уонна Бырабыыталыстыбатын пресс-сулууспата