Аллараа Бэстээх бөһүөлэгэр маҥнайгы кылааска барыта омук оҕолоро киирбиттэр диэн сымыйа хаартысканы тарҕаттылар

Мэҥэ Хаҥалас улууһун үөрэҕин управлениета иһитиннэрбитинэн, социальнай ситиминэн тарҕана сылдьар оҕолордоох хаартыска – сымыйа. Бу туһунан Үөрэх уонна билим министиэристибэтин телеграм-ханаалыгар суруйаллар.

“Бу хаартыска сыллата балаҕан ыйын 1 күнүн иннинэ күөрэйэн тахсар, дьиҥнээх олоххо туохха да сыһыана суох.

Бу күннэргэ Мэҥэ Хаҥалас улууһун Аллараа Бэстээх бөһүөлэгэр оҕолор оскуолаҕа бараары бэлэмнэнэллэр. Саҥа үөрэх дьылыгар манна биэс 1 кылаас аһыллыаҕа: үс кылаас М.Е.Попов аатынан Аллараа Бэстээх орто оскуолатыгар уонна икки кылаас Аллараа Бэстээх 2-с нүөмэрдээх оскулатыгар. Кылаастар үөрэх ирдэбилин ыстандаартыгар олоҕуран таҥыллыбыттара, араас оҕолор үөрэнэллэр (смешанные).

Саха сиригэр, Арассыыйаҕа барытыгар курдук, оҕо барыта хаачыстыбалаах үөрэҕи ылар тэҥ бырааптаах. Оҕону омугунан (по национальному признаку) араара сатааһын букатын сыыһа” – диэн министиэристибэ телеграм-ханаалыгар суруллар.

Онон социальнай ситиминэн тарҕанар суругу, хаартысканы, видеоны барытын ыраас мууска ылынан, тарҕатан иһимэҥ. Кэлин ити курдук сымыйа сурах тарҕанара үгүс. Официальнай саайтар эрэ суруйууларыгар сигэниҥ.