Аллараа Бэстээх оскуолатын дириэктэрэ “Сыл дириэктэрэ” куонкурус финалыгар киирдэ

“Сыл дириэктэрэ” Бүтүн Арассыыйатааҕы идэ куонкуруһугар 30 финалист сүүмэрдэннэ, кинилэр кэккэлэригэр Мэҥэ Хаҥалас улууһун Аллараа Бэстээх 2-с нүөмэрдээх орто оскуолатын дириэктэрэ Ольга Колмакова киирдэ.

Сүүмэрдиир (кэтэхтэн) түһүмэх атырдьах ыйын 15-28 күннэригэр ыытылынна. Манна онлайн-тест уонна электроннай портфолионы билиһиннэрии киирэр. Дойду бары муннугуттан, уопсайа, тыһыынчаттан тахса дириэктэр сайаапка ыыппыт. Сүүмэрдиир түһүмэх кэнниттэн 30 кыттааччыны быһаарбыттар. Кинилэр балаҕан ыйын 29 – алтынньы 4 күннэригэр Москваҕа буолар сүрүн түһүмэххэ кыттыахтара. Куонкурус түмүгүнэн 10 лауреаты, 5 призеру уонна биир кыайыылааҕы быһаарыахтара диэн СӨ Үөрэҕи сайыннарар уонна идэ таһымын үрдэтэр институт пресс-сулууспата суруйар. Биир дойдулаахпытыгар Ольга Колмаковаҕа ситиһиилэри баҕарабыт! О.В. Колмакова «Саха сирэ» хаһыакка биэрбит интервьютун манна ааҕыҥ.