Аллараа Бэстээххэ бастакы «Волгабастары» собуоттан  аҕаллылар

«Волгабас» мааркалаах бастакы  оптуобустары массыына собуотуттан Аллараа Бэстээххэ тириэртилэр. Тохсунньу бүтүүтэ Дьокуускай маршруттарыгар сырыыны саҕалыахтара.

«Массыыналары сылаас гарааска ириэрэн, собуоттаатылар. Сотору киин куоракка киллэриэхтэрэ. Санаттахха, быйыл уопсайа Тырааныспар министиэристибэтин өйөбүлүнэн чааһынай таһааччылар орто кылаастаах 50 оптуобуһу лиизиҥинэн ылбыттара. Наадалаах бэлэмнэнии уонна докумуоннары оҥотторуу кэнниттэн, тохсунньу бүтүүтэ  куорат маршруттарыгар тахсыахтара диэн былаанныыбыт. Эргэрбит «ПАЗиктары» солбуйуохтара», — диэн Дьокуускай баһылыга Евгений Григорьев бэйэтин ТГ-ханаалыгар иһитиннэрдэ.

Уопсайа 2022 сылтан «ЯПАК» тэрилтэҕэ уонна «Союз Авто» чааһынай таһааччыларыгар анаан орто уонна улахан кылаастаах 174 саҥа оптуобус лиизиҥинэн атыылаһыллыбыт.