Аллараа Бэстээххэ буруйу сэрэтэр үлэни күүһүрдэр инниттэн видеокамералары холбоотулар

Мэҥэ Хаҥалас улууһун киинигэр Аллараа Бэстээххэ буруйу сэрэтэр үлэни күүһүрдэр инниттэн видеокамералары холбоотулар. Бу туһунан улуус баһылыга Дмитрий Тихонов телеграм-ханаалыгар иһитиннэрэр.

«Бу үлэбитин балтараа сыл анараа өттүгэр «Ростелеком» Мэҥэ Хаҥаластааҕы салаатын салайааччытын Владислав Агитович Неустроевы, Ис Дьыала министиэристибэтин Мэҥэ Хаҥаластааҕы отделын начаалынньыгын Василий Иванович Пономареву кытта быһаарыныы ылынан саҕалаабыппыт.

Күн бүгүн биһиги улууспутугар Майа сэлиэнньэтигэр 35, Аллараа Бэстээххэ 25 камера барытын хабар, күнүстэри-түүннэри толору кэтиир буолуохтара.

Бу бырайыак улууспут олохтоохторо, ыалдьыттара куттала суох эйгэҕэ олороллорун хааччыйар инниттэн олоххо киирдэ», — диэн баһылык суруйар.