Аллараа Халымаҕа +4 кыраадыска диэри сылыйыа

Бүгүн, ахсынньы 28 күнүгэр, Саха сирин сорох улуустарыгар хаар түһэр, күүстээх тыал түһэр. Саамай дьиктитэ диэн — өрөспүүбүлүкэ хотугу улууһугар салгын температурата 0 кыраадыстан үөһэ тахсара сабаҕаланар. Бу туһунан УГМС саайта иһитиннэрэр.

Саха сиринээҕи Гидрометцентр синоптиктара билгэлииллэринэн, бүгүн өрөспүүбүлүкэ арҕаа уонна соҕуруу өттүгэр кыралаан, соҕуруулуу-арҕаа сөбүгэр, оттон Халымаҕа уонна Илин Эҥэр күүстээх хаар түһүөҕэ. Киин улуустарга туманнаах.

Тыал сөбүгэр соҕус, ол эрээри байҕал кытылыгар уонна соҕуруулуу-арҕаа сөкүүндэҕэ 15-20 миэтэрэҕэ диэри күүһүрүөн сөп. Манна силлиэ түһэн, суолу-ииһи хааччахтыыр кутталлаах.

Салгын температурата түүнүн -40-45 кыраадыс тымныы, хотугулуу-илин уонна хотугулуу-арҕаа намтал сирдэргэ -47-52 кыраадыска диэри тымныйыаҕа. Арҕаа -30-35, соҕуруу уонна Халыма диэки -20-25 кыраадыс тымныы. Күнүһүн -35-40, намталларынан -43-48 кыраадыс буолуоҕа.

Аллараа Халыма улууһугар олус сылаас күн-дьыл буолара күүтүллэр: түүнүн -11-16, сорох сирдэринэн -3-8 эрэ кыраадыс тымныы. Оттон күнүһүн -5-10, сорох сиринэн -1 уонна +4 кыраадыска диэри сылыйыа

Дьокуускайга улахан сөҥүүтэ суох, түүнүн уонна сарсыарда туман түһэр. Түүн соҕуруулуу-арҕааттан, күнүһүн хотуттан тыалырыа. Салгын температурата түүн -42-44, күнүһүн -38-40 кыраадыс тымныы.