Аллараа Халымаҕа оскуола уонна балыыһа тутуохтара

Ил Дархан Айсен Николаев оробуочай сырыытынан Аллараа Халыма оройуонугар сылдьан улуус баһылыга Ярослав Бандеровтыын көрүстэ. Кэпсэтии сүрүн тиэмэтинэн  байыаннай дьайыы кыттыылаахтарын өйөөһүн буолла.

Ярослав Алексеевич — байыаннай дьайыы кыттыылааҕа. Ааспыт сыл балаҕан ыйыгар быыбарга кыайан баһылык буолбута. Онон байыаннай дьайыы кыттыылаахтарыгар уонна кинилэр дьиэ кэргэттэригэр көмөнөн тус бэйэтэ дьарыктанар.

Маны сэргэ сааскы халаан тула кэпсэттилэр. Муус Халыма өрүскэ кэлэн, уу таһыма Походскай нэһилиэккэ киритиичэскэй бэлиэттэн үрдүгүн көрдөрбүт. Итиэннэ улууска эбийиэктэри тутуу туһунан кэпсэтии барбыт. Ол курдук, Ил Дархан Халыма нэһилиэгэр оскуола-уһуйаан, Черскэйгэ балыыһа тутуутун туһунан бэлиэтээн эттэ.

«Ярослав Алексеевич Бандеровтыын оройуон олоҕун-дьаһаҕын туһунан кэпсэттибит, байыаннай сулууспалаахтары өйүүртэн саҕалаан оройуон экэниэмикэтигэр тиийэ. Социальнай суолталаах эбийиэктэри тутуулар, ол курдук ГУП ОДьКХ, Саханефтегазсбыт, ону сэргэ бу сылларга Халыма нэһилиэгэр оскуола тутуутун туһунан кэпсэттибит. 2026 сылтан Черскэйгэ оройуон киин балыыһатын тутуутун саҕалыахпыт», — диэтэ Ил Дархан.