ВИДЕО: Аллараа Халымаҕа үрүҥ эһэлэри күһүҥҥү кэтээн көрүү ыытыллар

Балаҕан ыйын 20 күнүттэн «Курдигино-Крестовая» уонна «Чайгургино» эркээйи сирдэргэ үрүҥ эһэлэри күһүҥҥү кэтээн көрүү саҕаланна. Бу туһунан Саха Сирин биологическай ресурсаларын Дирекциятa иһитиннэрдэ.

Аллараа Халыма улууһун Ураты харыстанар айылҕа сирдэрин старшай судаарыстыбаннай иниспиэктэрэ Руслан Слепцов этэринэн, бүгүҥҥү күҥҥэ 17 үрүҥ эһэ бэлиэтэннэ. Кинилэр истэригэр – быйылгы 7 эһэ оҕото баар. Иниспиэктэр эһэлэр орто уойуулаахтарын уонна кутталлаах быһыыны-майгыны үөскэппэттэрин бэлиэтээтэ.

Судаарыстыбаннай иниспиэктэр Руслан Слепцов бырайыага Аллараа Халыма улууһун «Курдигино-Крестовая» уонна «Чайгургино» Ураты харыстанар айылҕа сирдэригэр үрүҥ эһэ популяциятын туругун чинчийэн, кинилэри харыстыырга наукаҕа олоҕурбут миэрэлэри оҥорон таһаарар сыаллаах. Саха сирин Илин Сибиирдээҕи байҕал кытылыгар үрүҥ эһэни кэтээн көрүү Бэрэсидьиэн Айылҕа пуондатын өйөбүлүнэн ыытыллар.