Аллараа Кураанахха дьиэ баһаарыгар икки киһи өллө

Суукка иһигэр өрөспүүбүлүкэҕэ биэс буруйу оҥоруу тахсыбытын туһунан СӨ Борокуратуурата иһитиннэрэр.

Дьокуускайга уонна Ленскэйгэ түөкүттэр дьонтон 137 тыһ.солк. сойбоппуттар. Киин куоракка уоруу буолбут уонна аһыы утаҕы иһэн баран уруулга иккистээн олорбут киһини туппуттар.

Алдан оройуонун Аллараа Кураанах бөһүөлэгэр Школьнай уулуссаҕа чааһынай мас дьиэ умайбыт. Баһаар буолбут дьиэтиттэн 1953 с.т. эр киһи уонна 1968 с.т. дьахтар өлүктэрин булбуттар. Уот туохтан барбытын быһаараллар.

Киһи өлүүлээх суол быһылаана тахсыбатах. Алдаҥҥа «Тойота Хайс» массыына суолтан туораан, икки пассажир эчэйэн госпитализацияламмыт. Аммаҕа «Тойота Ипсум» массыына түҥнэстэн, икки пассажир госпитализацияламмыт.

Суукка иһигэр итирик туруктаах 25 суоппары туппуттар.