Алмаасчыт идэтигэр бэлэмнээһин

Тохсунньу ый – Дьокуускайга өрөспүүбүлүкэ бүттүүнүттэн учууталлар түмсэр үгэскэ кубулуйбут кэмнэрэ. Өрөспүүбүлүкэ үөрэҕин үлэһиттэрин тохсунньутааҕы мунньахтара – киэҥ хабааннаах былаһаакка, манна педагогтар аныгы кэм ыҥырыыларын уонна үөрэхтээһин саҥа ньымаларын дьүүллэһэллэр. Быйылгы сыл сүрүн тиэмэтинэн идэҕэ анаан  бэлэмнээһин буолла. Политэхиньиичэскэй үөрэхтээһиҥҥэ, бырамыысыланнас эйгэтин исписэлиистэрин бэлэмнээһиҥҥэ анаммыт дьүүллэһэр былаһаакка ураты интэриэһи тарта. Бу сытыы боппуруостары дьүүллэһиигэ Саха сирин үлэнэн бөдөҥ хааччыйааччыта – АЛРОСА хампаанньа бэрэстэбиитэллэрэ кытыннылар.   

Политэхиньиичэскэй үөрэхтээһин  кэм ирдэбилэ буолбута бырамыысыланнаска каадырдарга улахан наадыйыыны кытта ситимнээх.  Ол курдук, бүгүн Саха сирин бырамыысыланнаһыгар 100 тыһыынча кэриҥэ киһи үлэлиир, кэлэр биэс сылга өссө араас идэлээх 17 тыһыынча исписэлиис наада. Саха сиригэр бырамыысыланнас сайдыытын уонна каадырдарга наадыйыы туһунан СӨ бырамыысыланнаска уонна геологияҕа миниистирэ Максим Терещенко кэпсээтэ. Кини этэринэн, өрөспүүбүлүкэ “Геология: возрождение легенды” федеральнай пилотнай бырайыакка кыттар уонна быйыл геологическай-чинчийэр үлэлэр Саха сирин аҕыс оройуонугар ыытыллыахтара.  “Федеральнай үбүлээһининэн  чугастааҕы үс сылга угуллубут үп-харчы бырамыысыланнас инникитин үгүс сылларга үүнэр-сайдар тирэҕин хааччыйыаҕа. Онон кэлэр уон сылга бу үлэнэн өрөспүүбүлүкэ хайы-үйэ 20 оройуона хабыллыаҕа. Бырагырааманы ситиһиилээхтик олоххо киллэрии усулуобуйаларыттан биирдэстэринэн элбэх ахсааннаах геологтары, машинистары, өрөмүөннээччилэри, юристары, айти-исписэлиистэри уонна да атыттары бэлэмнээһин буолар.  Миниистир этэринэн, Үөрэх министиэристибэтин кытта бииргэ үөрэнээччилэр уонна устудьуоннар ортолоругар геологияҕа олимпиада ыытыллар. Ону тэҥэ сыһыаннаах идэлэр (сквозная профориентация) кэнсиэпсийэлэрин бырагыраамата торумнаммыта, онно АЛРОСА хампаанньа көхтөөтүк кыттыбыта, ол ыччаты бырамыысыланнаска көдьүүстээхтик кытыннарарга көмөлөһүөҕэ.

 “АЛРОСА бэйэтигэр үлэҕэ  Бүлүү эрэ ыччатын буолбакка, өрөспүүбүлүкэ атын оройуоннарыттан кытыннарара интэриэһинэй. Хампаанньа бу салааҕа каадырдары тардыыга үтүө холобуру көрдөрөр. Холобура, быйыл АЛРОСА бэрэстэбиитэллэрэ, ол иһигэр “Муус Устар” бэстибээл чэрчитинэн идэҕэ бэлэмнээһин үлэтин ыытыахтара. Бу хампаанньаны кытта бииргэ үлэлээһин биһиэхэ киэҥ хабааннааҕын көрдөрөр”, — диэн Максим Терещенко бэлиэтээтэ.

 “АЛРОСА-кылаас” выпускниктарыгар үрдүк үөрэх кыһатыгар 1 куурустан истипиэндьийэлээх бырагыраама үлэлиир. Ыйдааҕы истипиэндьийэ кээмэйэ 2025 сыл тохсунньу 1 күнүттэн 22440 солкуобайга тэҥнэһэр. Үөрэхтэрин бүтэһик сылыгар устудьуоннар В.И.Тихонов аатынан истипиэндьийэни ылыахтарын сөп, ону ааспыт кууруска биэстэн итэҕэһэ суох (туйгун) орто баалы ыллахтарына төлөнөр.   

АЛРОСА бырагыраамаларын выпускниктарын 90 %  тэхиньиичэскэй идэлэргэ киирэллэр

Алмааһы хостооччулар бэрэстэбиитэллэрэ бэйэлэрин идэҕэ бэлэмниир уопуттарын туһунан санааларын үллэһиннилэр. АЛРОСА Биир кэлим батарар тэрилтэтин персоналы кытта үлэҕэ менеджерэ Ольга Саввина иһитиннэрбитинэн, хампаанньа Корпоративнай университета идэҕэ бэлэмнээһин эйгэтигэр көхтөөхтүк үлэлиир уонна инникитин хампаанньаҕа киирэн бырамыысыланнаска карьераларын ситиһиилээхтик оҥорор исписэлиистэри бэлэмнииргэ дьулуһар.

Бу АЛРОСА инники кэскилигэр инвестицията буолар.  “Биһиги үөрэнээччилэргэ табыгастаах үөрэх эйгэтин тэрийэргэ дьулуһабыт уонна инженернэй-тэхиньиичэскэй идэлэри сөптөөхтүк талалларыгар көмөлөһөбүт.  Уопут көрдөрөрүнэн, биһиги выпускниктарбыт 90 % тэхиньиичэскэй идэлэргэ киирэллэр, ол хампаанньаҕа салгыы үлэҕэ киирэр кыаҕы улаатыннарар” – диэн Ольга Саввина кэпсээтэ.

Хампаанньа Корпоративнай университетын араас көрүҥнээх үөрэтэр бырагыраамаларын ортотугар идэҕэ бэлэмниир түөрт сүрүн бырайыак баар.  “АЛРОСА-кылаас” 10-11 кылаастар үөрнээччилэрин БКЭ-ни ситиһиилээхтик туттарыыга уонна инженернэй-тэхиньиичэскэй идэлэргэ дойду бастыҥ үрдүк үөрэх кыһаларыгар киирэргэ бэлэмниир.  “Профи Club”  ыччакка дьиҥнээх кэрэхсэнэр үлэни биэрээччи быһыытынан хампаанньа аатын-суолун (брендин) киэҥник тэнитиигэ туһуланар, ону тэҥэ Хампаанньаҕа наадалаах оробуочай идэлэри уонна хайысхалары кытта билиһиннэрэр.  “Техномодуль” естественнэй-научнай уонна тэхиньиичэскэй үлэни өйүүр кыахтаах табыгастаах усулуобуйалары уонна тупсарыллыбыт хас да таһымнаах үөрэх эйгэтин тэрийиигэ туһуланар, хампаанньаҕа үрдүк таһымнаах саҥа каадырдары бэлэмнээһиҥҥэ дьулуһар. “Мой выбор” – Мииринэй оройуонун үөрэнээччилэригэр сыл аайы ыытыллар идэҕэ туһаайар хамаанданан оонньуу. Бу оонньуу  хампаанньаҕа наадалаах идэлэри кытта оҕолор бэйэлэрэ билсэллэригэр көмөлөһөр.

АЛРОСА тэйиччиттэн бырагыраамалара педагогтар интэриэстэрин олус тарта, чуолаан, “АЛРОСА-кылаас” уонна “Профи Club”.  Бастакы бырайыак чэрчитинэн Мииринэйгэ кэлэн үөрэниини сэргэ онлайн-кылаастар Нам, Ньурба, Мэҥэ Хаҥалас, Горнай улуустарыгар,  “Профи Club” Мииринэй, Горнай уонна Уус Алдан улуустарыгар бааллар.     Бу оройуоннар  оскуолаларын үөрэнээччилэрэ математикаҕа, физикаҕа уонна информатикаҕа эбии консультациялары ылар кыахтаахтар, тэхиньиичэскэй английскай тыл кууруһун ааһаллар, олор оҕолорго дириҥ билиини биэрэллэр.

.Бастакы ”АЛРОСА-кылаас” Мииринэй куоракка политэхиньиичэскэй лиссиэй базатыгар 2016 сыллаахха аһыллыбыта.     Бүгүн бырайыак бэйэтин таһымын уонна географиятын кэҥэттэ – АЛРОСА икки стационарнай корпоративнай кылааһы уонна тэйиччиттэн 10 кылааһы арыаллыыр, баларга Саха сирин, Забайкалье кыраайын, Иркутскай уонна Иркутскай уобалас араас оройуоннарыттан үөрэнэллэр.   

Үөрэх бырагырааматыгар ЗабГУ уонна ИРНИТУ, ону тэҥэ Челябинскайдааҕы политэхиньиичэскэй лиссиэй профессордарын-преподавателлэрин уруоктара киирэллэр. Корпоративнай кылаастар үөрэнээччилэрэ “АЛРОСА-сменаларга” Иркутскайга уонна Читаҕа бараллар, манна үөрэнээччилэри геология уонна алмааһы хостооһун эйгэтигэр бастыҥ технологиялары кытта билиһиннэрэллэр.  Оҕолор  геология, геодезия, геотехнология, хайа дьыалатын уонна 3D-моделирование төрүттэрин үөрэтэллэр, маастар-кылаастарга уонна практическай дьарыктарга кытталлар”, — диэтэ Ольга Саввина.

Ону тэҥэ үөрэнээччилэри кытта АЛРОСА Корпоративнай университетын идэҕэ туһаайар хайысхалаах исписэлиистэрэ дьарыктаналлар. Кинилэр бэйэлэрин үөрэнээччилэрин хампаанньаҕа олус наадалаах идэлэри кытта билиһиннэрэллэр, АЛРОСА сотрудниктарын кытта көрсүһүүлэри тэрийэллэр, онно кинилэр бэйэлэрин уопуттарын кытта билиһиннэрэллэр: идэлэрин хайдах талбыттарын, үөрэммиттэрин уонна хампаанньаҕа хайдах үлэҕэ киирбиттэрин туһунан.  Бу барыта үөрэнээччилэргэ кэлэр өттүгэр идэлэрин сөпкө талалларыгар көмөлөһүөҕэ.

Үөрэнээччилэр “АЛРОСА-кылаас” туһунан

“АЛРОСА-кылаас” идэҕэ бэлэмниир бырайыак үөрэнээччилэргэ бэйэлэрин билиилэрин босхо дириҥэтэргэ, идэтийбит бэлэмнэниини, АЛРОСА-тан истипиэндьийэни ыларга, ону тэҥэ производствоҕа стажировканы уонна быраактыканы ааһарга   кыаҕы биэрэр. Оттон үөрэнээччилэр бэйэлэрэ туох дии саныылларый?

Алёна Павленко, 10 онлайн-кылаас, Мииринэй оройуона:

— “АЛРОСА-кылааска” үөрэнии миэхэ эксээмэннэргэ балачча хаачыстыбалаахтык бэлэмнэнэрбэр көмөлөһөр дии саныыбын. Ону тэҥэ бу туох эрэ саҥаны билэрбэр кыаҕы биэрэр. Инникитин идэбин  АЛРОСА хампаанньаны кытта сибээстиэхпин баҕарабын.

Александр Аргунов, 10 онлайн-кылаас, Хаҥалас улууһун Покровскай к. :

— “АЛРОСА-кылааска” үөрэнии миэхэ эбии билиини биэрэр. Мин олохпун АЛРОСА хампаанньаны кытта сибээстиир санаалаахпын уонна геолог эбэтэр гидрогеолог буолар баҕалаахпын.

Максим Щекалев, 10 АЛРОСА-кылаас, Мииринэй оройуона:

— “АЛРОСА-кылааска” киирбиппиттэн олус үөрэбин, манна олус үчүгэй учууталлар бааллар. Биһиэхэ хайа дьыалатын кытта сибээстээх араас идэлэр тустарынан кэпсииллэр, ол инники өттүгэр бэйэм баҕа санаабын олоххо киллэрэрбэр көмөлөһүөҕэ. Ол иһин олохпун АЛРОСА-лыын сибээстиэхпин баҕарабын, инники өттүгэр улахан кэскиллээх хампаанньанан ааҕабын.

Айхал Стручков, 10 онлайн-кылаас, Хаҥалас улууһун Тиит Арыы сэл., Хаҥалас улууһа:

— Миэхэ “АЛРОСА_кылаас” эксээмэннэрбин туттарарбар туһалаах буолуоҕа. Кэлэр өттүгэр АЛРОСА-ҕа үлэҕэ киириэхпин баҕарабын.

Айтал Слепцов, 11 онлайн-кылаас, Нам улууһун Нам сэл. :

— АЛРОСА-ҕа дьарыктаныы олус туһалаах дии саныыбын, иллэҥ кэммэр дьарыктаах буолбуппуттан үөрэбин. Талан ылар идэбинэн инники олохпун АЛРОСА хампаанньаны кытта сибээстиэхпин сөп.

Хампаанньа Арассыыйа үрдүнэн 80 үөрэх тэрилтэтин кытта быһаччы үлэлэһэр уонна дэгиттэр таһымнаах каадырдары бэлэмнээһиҥҥэ табыгастаах усулуобуйаны тэрийэр, идэҕэ туһаайар үлэҕэ үрдүк интэриэстээх. Бу АЛРОСА салааҕа, ону тэҥэ эрэгийиэн уонна дойду экэниэмикэтин сайдыытыгар инники күөҥҥэ сылдьар кыаҕын бөҕөргөтүүгэ дьоһун суолталаах усулуобуйанан буолар.

АЛРОСА Корпоративнай университета АЛРОСА-ны кытта бэйэтин инники карьератын ситимниир баҕалаах  устудьуоннары уонна үөрэнээччилэри бэйэтин бырагыраамаларыгар  кытталларыгар ыҥырар. Билигин бырагыраамалары кытта АЛРОСА Корпоративнай университетын https://cpk-alrosa.ru. дьиҥ таһымнаах саайтыгар билсиэххэ сөп. Бу бырагыраамаларга кыттар туһунан   molodezh@alrosa.ru электроннай почтанан сайаапкаҕытын ыытыҥ.