“Алмаасэргиэнбаан” социальнай остолобуойга көмөлөстө

Дьокуускайга биэс сыл устата социальнай остолобуой үлэлиир. Манна кыаммат дьону босхо аһаталлар. “АЭБ” социальнай остолобуойу үлэлэтэр Ирина Гузоваҕа бородуукталары тиэртэ.

— Баантан эрийбиттэригэр, соһуйан хаалбытым. Мин баан килийиэнэ буолбатахпын, төлөпүөнүм нүөмэрин хантан булбуттара буолла? Билигин саамай наадалаах бородуукталары – үүнээйи арыытын уонна элбэх эти аҕаллылар. Дьиҥэ, биһиэхэ элбэх киһи көмөлөһөр, ол да иһин инчэҕэй тирбэҕэ быстыбатыныы, үлэлии олоробут. “Алмаасэргиэнбааҥҥа” уонна бары үтүө санаалаах дьоҥҥо махталбын тиэрдэбин, — диэн Ирина Борисовна этэр.

Социальнай остолобуой 2017 сыллаахха “Графский берег” кафе дьиэтигэр арыллыбыта. Ыарахан балаһыанньаҕа түбэспит дьоҥҥо көмөлөһөр сыаллаах. Онон соҕотох олорор кырдьаҕастары, инбэлииттэри, элбэх оҕолоох кыаммат ыаллары, уо.д.а. босхо аһаталлар. Нэдиэлэҕэ үстэ – оптуорунньукка, чэппиэргэ, субуотаҕа итии аһылыгынан күндүлүүллэр. Пандемия кэмигэр 150-ча эбиэти дьиэлэригэр тиэрдэллэрэ. Ол эрээри, грант харчыта бүтэн, дьиэҕэ тиэрдии тохтообут.

Социальнай остолобуойга өссө бырааһынньыктары тэрийэллэрэ.

Ирина Гузова 63 саастаах, былырыын кини искэн ыарыытынан ыалдьара биллибитэ. Ол эрээри, кини быар куустан олорор кыаҕа суох, “үлэлиир буоламмын, ыарыым туһунан санаабаппын, үлэм миэхэ дуоһуйууну аҕалар” диир. Ыараханнык ыалдьарын билэн баран, кыыһа “барытын атыылаан баран, доруобуйаҕынан дьарыктан” диэбитин, сөбүлэспэтэх.

“Киһи ыарахан балаһыанньаҕа түбэстэҕинэ, өйүөххэ, көмөлөһүөххэ наада. Саатар нэдиэлэҕэ үстэ итии миин уонна килиэп күүтэрин санаатаҕына, санаата түһүө суоҕа”, — диэн социальнай остолобуой хаһаайката этэр.