Алмазэргиэнбаан активын кээмэйинэн Арассыыйаҕа топ-100 баан иһигэр киирдэ

2025 сыл түмүгүнэн Алмазэргиэнбаан дойду үп ырыынагар бигэ тирэхтэннэ уонна Арассыыйа топ-100 баанын иһигэр киирдэ.

Бу туһунан бүгүн Ил Дархан Айсен Николаевка 2025 с. түмүктэрин таһаарыыга иһитиннэрдилэр.

Айсен Николаев тустаах баан сааҥсыйа ыгыытын, уустук макроэкэнэмиичэскэй балаһыанньаҕа туруктаахтык, барыстаахтык үлэлээбитин бэлиэтээтэ.

“Арассыыйа Киин баанын тутаах үрдүк ыстаапкатын кытта сибээстээх уопсай уустук экэнэмиичэскэй усулуобуйаларга баан сүрүн соруктарын толордо. Алмазэргиэнбаан биир сиргэ турбакка сайдан, өрөспүүбүлүкэ таһыгар хайысхалары булар”, — диэтэ Саха сирин баһылыга.

Айсен Николаев этэринэн, Алмазэргиэнбаан өрөспүүбүлүкэ олохтоохторугар уонна тэрилтэлэригэр үпкэ-харчыга патрнерунан буолар.

“Биһиги салгыы цифровой сервистэри сайыннарыахпыт, бородуукта линейкаларын кэҥэтиэхпит, социальнай уонна үөрэхтээһин көҕүлээһиннэрин өйүөхпүт”, — диэтэ Бырабылыанньа Бэрэссэдээтэлэ Николай Долгунов.

Баан цифровой сервистэри тиһиктээхтик сайыннарар. Кэнники сылларга килийиэннэр эргитэр үптэрэ үс төгүл улаатта. Счеттарга сытар физическэй уонна юридическай сирэйдэр үптэрэ баан бигэ тирэхтээҕин туоһулуур.

СӨ Ил Дарханын  көҕүлээһининэн эрэгийиэҥҥэ “Карта юного жителя Якуии” бырайыак үлэлээтэ. Ону тэҥэ “Квартира от АЭБ” аахсыйаны ыытта. Онон килийиэннэр баазалара хаҥаата.

Алмазэргиэнбаан култуура, үөрэх, успуорт көҕүлээһиннэрин өйүүр. Аһымал уонна успуонсардар бырайыактарыгар кыттар. 2019 сылтан нолуогу, дивиденнэри төлөөһүн кээмэйинэн, ону тэҥэ спонсорствоҕа ыытыллыбыт үп кээмэйэ 4,2 млрд солк. тэҥнэстэ.

Тэрээһини түмүктүүрүгэр Айсен Николаев баан Саха Өрөспүүбүлүкэтин социальнай-экэнэмиичэскэй сайдыытыгар дьоһун кылаатын бэлиэтээтэ.

sakha.gov.ru

Сиһилии: https://www.sakha.gov.ru/news/17472